ວາງສີລາລຶກໂຄງການກໍ່ສ້າງ ພະເຈົ້າໃຫຍ່ ພຸດທະຣັດຕະນະບາຣະມີສຣີ ບໍ່ແກ້ວ

ມີພິທີວາງສີລາລຶກໂຄງການກໍ່ສ້າງ ພະເຈົ້າໃຫຍ່ ພຸດທະຣັດຕະນະບາຣະມີສຣີ ບໍ່ແກ້ວ ທີ່ພູໄຊຫົວຂອງ  ເມືອງຫ້ວຍຊາຍ ໄດ້ມີຂຶ້ນໃນວັນທີ 17 ພຶດສະພານີ້ ເພື່ອເປັນບ່ອນສັກກະລະບູຊາ, ເປັນສູນລວມຈິດໃຈ ຂອງຊາວພຸດທະສານິກະຊົນລາວ ກໍຄື ຊາວແຂວງບໍ່ແກ້ວ, ສ້າງໃຫ້ກາຍເປັນແຫລ່ງທ່ອງທ່ຽວທີ່ສໍາຄັນ ທາງວັດທະນະທໍາ ຕິດພັນກັບທໍາມະຊາດ ແລະ ມູນເຊື້ອທາງດ້ານປະຫວັດສາດ, ໂດຍມີພະເຖລານຸເຖລະ, ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ທ່ານ ສົມສະຫວາດ ເລັ່ງສະຫວັດ ອະດີດກົມການເມືອງສູນກາງພັກ, ມີບັນດາການນໍາ ພັກ-ລັດ ແລະ ທ້ອງຖິ່ນ ພ້ອມດ້ວຍມວນຊົນເຂົ້າຮ່ວມຢ່າງຫລວງຫລາຍ.

ທ່ານ ຄໍາພັນ ເຜີຍຍະວົງ ກໍາມະການສູນກາງພັກ, ເລຂາພັກແຂວງ, ເຈົ້າ ແຂວງບໍ່ແກ້ວ ກ່າວວ່າ: ໂຄງການກໍ່ສ້າງພະເຈົ້າໃຫຍ່ ພຸດທະຣັດຕະນະບາຣະມີສຮິ  ແຫ່ງນີ້  ມີຄວາມໝາຍສໍາຄັນທາງດ້ານປະຫວັດສາດຂອງແຂວງ ເຊິ່ງເປັນໂຄງການທີ່ໄດ້ຜ່ານການສຶກສາ, ຄົ້ນຄວ້າ ແລະ ອອກແບບຢ່າງລະອຽດມາເປັນເວລາ 2 ປີ ກວ່າ, ໂດຍໄດ້ຮັບການສະໜັບສະໜູນເຫັນດີເຫັນພ້ອມ ຈາກລັດຖະບານ, ອົງການພຸດທະສາສະໜາສໍາພັນລາວ ແລະ ພາກສ່ວນກ່ຽວຂ້ອງຂັ້ນສູນກາງ ກໍຄື ທ້ອງຖິ່ນ, ພິເສດ ແມ່ນໄດ້ຮັບການສະໜັບສະໜູນຈາກປະຊາຊົນບັນດາເຜົ່າ. ເຊິ່ງບ່ອນທີ່ຕັ້ງພະພຸດທະຮູບໃຫຍ່ແຫ່ງນີ້  ເປັນສະຖານທີ່ມີຄວາມສັກສິດ ແລະ ເປັນບ່ອນທີ່ປະທັບໃຈ ຂອງຊາວແຂວງບໍ່ແກ້ວ, ແລະ ຈະກາຍເປັນໃຈກາງຂອງເມືອງຫ້ວຍຊາຍ ໃນອານະຄົດ ແລະ ເປັນຈຸດໃຈກາງ ຂອງການພັດທະນາທາງດ້ານເສດຖະກິດ-ສັງຄົມ, ວັດທະນະທໍາ, ສາສະໜາ, ທ່ອງທ່ຽວ ແລະ ເປັນບ່ອນຊັກກະລະບູຊາ ຂອງປະຊາຊົນບັນດາເຜົ່າ ແຂວງບໍ່ແກ້ວ.

ໂຄງການກໍ່ສ້າງພະເຈົ້າໃຫຍ່ອົງດັ່ງກ່າວ ແມ່ນພະປາງຊະນະມານ ໄດ້ນາມມາຈາກພະເຈົ້າແສນແຊ່ ໄດ້ປະດິດສະຖານ ຢູ່ວັດສີບຸນເຮືອງ ເມືອງຕົ້ນເຜີ້ງ ແຂວງບໍ່ແກ້ວ ໃນປີ ພສ 2386 ຄສ 1843 ເປັນພະເຈົ້າທີ່ມີຄວາມໝາຍສໍາຄັນ ທາງພຸດທະສາສະໜາ ທີ່ມີຄວາມສວຍສົດງົດງາມ, ເປັນພະອົງທີ່ສັກສິດຄູ່ບ້ານຄູ່ເມືອງ, ມີບາຣະມີສູງ ເປັນສູນລວມຈິດໃຈຂອງປະຊາຊົນ. ຄະນະນໍາຂອງແຂວງ ຈຶ່ງໄດ້ຕົກລົງເຫັນດີເປັນເອກະພາບ ສ້າງຂຶ້ນ ແລະ ຕັ້ງຊື່ວ່າ: ພະພຸດທະຣັດຕະນະບາຣະມີສຣີ ບໍ່ແກ້ວ, ເຊິ່ງກໍານົດເອົາພູ 106 ເປັນຈຸດທີ່ຕັ້ງ  ໂດຍແມ່ນບໍລິສັດຮ່ວມໃຈ ສໍາຫລວດອອກແບບ ແລະ ທີ່ປຶກສາຈໍາກັດ ເປັນຜູ້ສໍາຫລວດອອກແບບ ໃນເນື້ອທີ່ 14 ເຮັກຕາ, ລວມມູນຄ່າການກໍ່ສ້າງ 54,8 ຕື້ກວ່າກີບ ແລະ ບໍລິສັດ ຫ່າຍເຊິງລາວ ຈໍາກັດ ເປັນຜູ້ຮັບເໝົາກໍ່ສ້າງ, ໂດຍທຶນສົມທົບ ລະຫວ່າງຄະນະອົງການພຸດທະສາສະໜາ, ຄະນະນຳຂັ້ນສູງ ແລະ ຄະນະນໍາຂອງແຂວງ, ບໍລິສັດຜູ້ລົງທຶນ, ນັກທຸລະກິດ, ຜູ້ປະກອບການ ແລະ ມວນຊົນ ໄດ້ມີສັດທາຮ່ວມກັນໃນການສ້າງບຸນກຸສົນ ສ້າງອົງພະເຈົ້າໃຫຍ່ດັ່ງກ່າວມີຊັດສ່ວນໜ້າຕັດກວ້າງ ຈາກເຂົ່າຊ້າຍຫາເຂົ່າຂວາ 17,1 ແມັດ, ສູງຈາກໜ້າແທ່ນ ເຖິງຈອມເກດ 25,2 ແມັດ ລວມນໍ້າໜັກ 90,78 ໂຕນ.