ຊ້າງນ້ອຍ ເອັຟຊີ ຊະນະ ດີເຄ ເອັຟຊີ 3-1

ໃນວັນທີ 16 ພຶດສະພານີ້ ທີ່ສະໜາມກິລາແຫ່ງຊາດລາວ ໄດ້ມີການແຂ່ງຂັນເປບຊີ ລາວ ພຣີເມຍລີກ 2018 ເຊິ່ງສະໂມສອນ ຊ້າງນ້ອຍ ເອັຟຊີ ສາມາດເອົາຊະນະ ສະໂມສອນ ດີເຄ ເອັຟຊີ 3-1 ໃນຮອບຕົກຄ້າງ.

ການແຂ່ງຂັນເປັບຊີ ລາວ ພຣີເມຍລີກ 2018 ດໍາເນີນມາຮອດຮອບຂາກັບ ເຊິ່ງບາງສະໂມສອນໄດ້ລົງສະໜາມຄົບ 7 ຄັ້ງແລ້ວ. ຂະນະທີ່ສະໂມສອນຊ້າງນ້ອຍ ເອັຟຊີ ຍັງຈະໄດ້ລົງສະໜາມອີກ 2 ຄັ້ງໃນຮອບຂາກັບ. ຫລ້າສຸດສາມາດເອົາຊະນະສະໂມສອນ ດີເຄ ເອັຟຊີ 3-1 ຂອງການລົງສະໜາມຄັ້ງທີ 4 ຈາກລູກຍິງຂອງທ້າວ ສຸລິວັນ ນິວອນ ນາທີ 71 ແລະ ທ້າວ ສົມໄຊ ແກ້ວຫານາມ ນາທີ 72 ແລະ ນາທີ 90+2, ສ່ວນ ສະໂມສອນ ດີເຄ ເອັຟຊີ ໄດ້ປະຕູຕີໄຂ່ແຕກຈາກທ້າວ Lee Minju.

ສະຫລຸບຕາຕະລາງການແຂ່ງຂັນສະໂມສອນ ລາວໂຕໂຢຕາ ເອັຟຊີ ຍັງເປັນອັນດັບທີ 1 ຂອງຕາຕະລາງໃນຮອບຂາກັບນີ້ ຈາກການລົງສະໜາມ 7 ຄັ້ງ ຊະນະ 5 ຄັ້ງ ສະເໝີ 1 ຄັ້ງ ເສຍ 1 ຄັ້ງ ລວມມີ 16 ຄະແນນ, ອັນດັບທີ 2 ສະໂມສອນ ປກສ ເອັຟຊີ ລົງສະໜາມ 5 ຄັ້ງ ຊະນະ 3 ຄັ້ງ ເສຍ 2 ຄັ້ງ ລວມມີ 9 ຄະແນນ, ຂະນະທີ ສະໂມສອນ ຊ້າງນ້ອຍ ເອັຟຊີ ຢູ່ອັນດັບທີ 4 ຂອງຕະຕາລາງຄະແນນ ຈາກການລົງສະໜາມ 5 ຄັ້ງ ຊະນະ 2 ຄັ້ງ ສະເໝີ 2 ຄັ້ງ ເສຍ 1 ຄັ້ງ ລວມມີ 8 ຄະແນນ.