ຜູ້ຕັດສິນບານໂລກ 2018 ຊາວຊາອຸດິອາຣາບີ ຖືກຫ້າມຕັດສິນຕະຫລອດຊີວິດ ຂໍ້ຫາຮັບສິນບົນໃນການຕັດສິນ
ໃນວັນທີ 16 ພຶດສະພາ, ສະຫະພັນບານເຕະຊາອຸດິອາຣາບີ (Saudi Arabian Football Federation) ໄດ້ປະກາດລົງໂທດ ຟາຮັດ ອາວເມຍດາຊີ (Fahad Al Mirdasi) ຜູ້ຕັດສິນບານເຕະລະດັບຟີຟາ ຫລັງສືບພົບວ່າ ຮັບສິນບົນກ່ອນລົງຕັດສິນການແຂ່ງຂັນບານເຕະຊິງຂັນເຈົ້າຊີວິດຂອງປະເທດ (King’s Cup) ຮອບຊິງຊະນະເລີດ ປະຈຳປີ 2018 ຄູ່ລະຫວ່າງ ອາວ ອິດທີຮັດ (Al Ittihad) ພົບກັບ ອາວ ໄຟຊາລີ (Al Faisaly) ໃນວັນທີ 12 ພຶດສະພາຜ່ານມາ ເຮັດໃຫ້ຄະນະຈັດການແຂ່ງຂັນສົ່ງ ມາກ ແຄັດເທັນເບີກ (Mark Clattenburg) ອະດີດຜູ້ຕັດສິນມື 1 ໃນ ພຣີເມຍລີກ ອັງກິດ ລົງຕັດສິນແທນ ຊຶ່ງຜົນການແຂ່ງຂັນເປັນ Al Ittihad ເອົາຊະນະ Al Faisaly 3-1 ໃນການຕໍ່ເວລາພິເສດ.
ຕໍ່ກັບບັນຫາດັ່ງກ່າວ ຄະນະກຳມະການດ້ານລະບຽບວິໄນຂອງຟີຟາ ໄດ້ຂໍຂໍ້ມູນເພີ່ມຕື່ມກັບສະຫະພັນບານເຕະຊາອຸດິອາຣາບີ ເພື່ອພິຈາລະນາຄະດີດັ່ງກ່າວ ເພາະວ່າ ຟາຮັດ ອາວເມຍດາຊີ ເປັນຫນຶ່ງໃນກຳມະການຕັດສິນທີ່ຖືກຄັດເລືອກຮ່ວມບານໂລກ 2018.
ສຳລັບ ຟາຮັດ ອາວເມຍດາຊີ ອາຍຸ 32 ປີ ເປັນກຳມະການລະດັບຟີຟາແຕ່ປີ 2011 ເຄີຍຕັດສິນບານເຕະຊິງແຊ້ມອາຊີ ຫລື ເອຊຽນຄັບ 2015, U20 ຊິງແຊ້ມໂລກ, ໂອແລມປິກເກມ 2016 ແລະ FIFA Confederations Cup 2017.
