ພັດທະນາການຂອງລູກນອ້ຍ ເດືອນທີ 6

ເດືອນທີ 6 ລູກນ້ອຍກໍາລັງປ່ຽນແປງຜ່ານຈາກເດັກນ້ອຍທີ່ນອນຫຼິ້ນມາເປັນນັ່ງຫຼິ້ນ ລວມທັງສົນໃຈໂລກອ້ອມໂຕ ແລະ ຊ່າງລົມຫຼາຍຂຶ້ນ.

1. ດ້ານສະຕິປັນຍາ ແລະ ການຮຽນຮູ້

• ຮຽນຮູ້ຄວາມສໍາພັນລະຫວ່າງມື ແລະ ສິ່ງຂອງທີ່ຢູ່ໃນມືຜ່ານການເຮັດຊໍ້າໆເຊັ່ນ: ບາງຄົນມັກຖິ້ມສິ່ງຂອງລົງພື້ນແລ້ວເຮັດຊໍ້າອີກ ເພື່ອສັງເກດປະຕິກິລິຍາຂອງສິ່ງທີ່ຕົກລົງພື້ນ
• ລະບົບປະສາດຕ່າງໆ ​ເຮັດ​ວຽກສໍາຜັດກັນຫຼາຍຂຶ້ນ, ຈັບສິ່ງຂອງດ້ວຍຄວາມ​ແນ່ນອນຫຼາຍຂຶ້ນ ເບິ່ງຕາມວັດຖຸໄດ້ທັງຊ້າຍ ແລະ ຂວາ, ແນວໃດກໍຕາມລູກນ້ອຍຄວນໄດ້ຮັບການພັດທະນາລະບົບການຮັບຮູ້ຢ່າງຮອບດ້ານ ທັງການເບິ່ງເຫັນ, ການໄດ້ຍິນ, ການສໍາຜັດ ເພາະເດັກທີ່ມີໂອກາດເບິ່ງເຫັນ, ໄດ້ຍິນ ແລະ ເຄື່ອນໄຫວໄປພ້ອມໆກັນຈະຮຽນຮູ້ ແລະ ພັດທະນາທັກສະການຄິດໄດ້ຫຼາກຫຼາຍ ແລະ ສະໝອງ​ເຮັດ​ວຽກເຊື່ອມໂຍງຢ່າງເປັນລະບົບຫຼາຍຂຶ້ນ
• ຮຽນຮູ້ ແລະ ເຂົ້າໃຈສິ່ງຕ່າງໆໄດ້ຫຼາຍຂຶ້ນ ໂດຍສະເພາະກິດຈະກຳປະຈໍາວັນ

2. ດ້ານຮ່າງກາຍ ແລະ ການເຄື່ອນໄຫວ

• ສາມາດຫັນຫນ້າອ່ຽງໂຕໄປມາໄດ້ຢ່າງຄ່ອງແຄ່ວເຊັ່ນທ່າພິກຂວ້ຳ ບາງເທື່ອອາດພິກຂວ້ຳມາເປັນທ່າທາງກິ່ງນັ່ງໄດ້
• ອາດເຫັນລູກພະຍາຍາມເຄື່ອນໄຫວໄປທາງໜ້າ
• ນັ່ງໄດ້ໝັ້ນຄົງຂຶ້ນ
• ສາມາດເຈັບປ໋ອງນົມໄດ້, ຈັບຈອກນໍ້າແບບມີຫູເອງໄດ້ແລ້ວ ຈັບຂອງຫຼິ້ນ ແລະ ປ່ຽນຂອງຈາກມືໜຶ່ງໄປອີກມືໜຶ່ງໄດ້ຢ່າງຄ່ອງແຄ່ວເຊັ່ນກັນ

3. ດ້ານພາສາ ແລະ ການສື່ສານ

• ລູກເລີ່ມສົ່ງສຽງຮຽນພະຍັນຊະນະໄດ້ຫຼາຍຂຶ້ນ, ຄຸມການອອກສຽງໄດ້ຫຼາຍຂຶ້ນ ແຕ່ຍັງບໍ່ເປັນພາສາ ແລະ ມັກໃຊ້ວິທີການສົ່ງສຽງເພື່ອບອກອາລົມຕ່າງໆຂອງຕົນເອງ
• ຮູ້ຈັກຊື່ຕົນເອງ ແລະ ພ້ອມຈະຫັນໜ້າເມື່ອມີຄົນຮ້ອງ

4. ດ້ານອາລົມ ແລະ ສັງຄົມ

• ເດືອນນີ້ເດັກນ້ອຍຫຼາຍຄົນເລີ່ມມີອາການຄັນ ແລະ ເຈັບເຫືອກຈາກການທີ່ແຂ້ວໃກ້ຈະອອກ ສົ່ງຜົນໃຫ້ລູກອາລົມບໍ່ດີ ແມ່ຄວນເອົາໝາກໄມ້ເນື້ອແຂງເຊັ່ນ ໝາກແຕງ ຫຼື ແອັບປິ່ນ ໃຫ້ລູກກັດຫຼິ້ນແກ້ອາການຄັນເຫືອກ
• ລູກຈະອາລົມດີ ຖ້າໄດ້ມີຄົນຫຼິ້ນນໍາ
• ມັກຍິ້ມໃຫ້ເງົາໃນແວ່ນ

ແນວໃດກໍຕາມພັດທະນາການຂອງເດັກແຕ່ລະຄົນບໍ່ເທົ່າກັນ ຂຶ້ນຢູ່ກັບຄວາມພ້ອມຂອງຮ່າງກາຍ ແລະ ໂອກາດທີ່ເຂົາຈະໄດ້ຮັບການກະຕຸ້ນ ແລະ ສົ່ງເສີມ ເພາະສະນັ້ນຢ່າເບິ່ງຂ້າມການເສີມສ້າງພັດທະນາການລູກນ້ອຍ.