ໂຄງການກໍ່ສ້າງສະຖາບັນຂົງຈື ຄາດວ່າຈະສໍາເລັດໃນຕົ້ນປີ 2019
ໂຄງການກໍ່ສ້າງສະຖາບັນຂົງຈື ທີ່ມະຫາວິທະຍາໄລແຫ່ງຊາດ ດຳເນີນໄປດ້ວຍດີ, ຊຶ່ງຄາດວ່າຈະສໍາເລັດກ່ອນຄາດໝາຍໃນເດືອນ ພຶດສະພາ 2019 ແລະ ເມື່ອອາທິດຜ່ານມາ, ທ່ານ ສົມສີ ຍໍພັນໄຊ ວ່າການອະທິການບໍດີມະຫາວິທະຍາໄລແຫ່ງຊາດ ໄດ້ໃຫ້ກຽດຕ້ອນຮັບ ທ່ານ ນາງ ກາວ ຢ້ຽນ ຮອງລັດຖະມົນຕີກະຊວງການຄ້າ ສປ ຈີນ ພ້ອມຄະນະໄດ້ລົງຢ້ຽມຢາມ ແລະ ຕິດຕາມກວດກາ ໂຄງການກໍ່ສ້າງອາຄານສະຖາບັນດັ່ງກ່າວ ຊຶ່ງແມ່ນການລົງທຶນ 100% ຈາກລັດຖະບານຈີນໂດຍກົງ.
ຫົວໜ້າຜູ້ຮັບຜິດຊອບໂຄງການກໍ່ສ້າງດັ່ງກ່າວ ໃຫ້ຮູ້ວ່າ: ໂຄງການກໍ່ສ້າງສະຖາບັນຂົງຈື ໄດ້ເລີ່ມລົງມືມາ ແຕ່ເດືອນກັນຍາ 2017 ໂດຍບໍລິສັດວິສະວະກໍາກໍ່ສ້າງ ແຂວງຈຽງຊູ ຈໍາກັດ, ເປັນອາຄານຮຽນ 3 ຊັ້ນ ແບບຮູບໂຕອີ(E), ລວມມູນຄ່າການກໍ່ສ້າງປະມານ 100 ກວ່າຕື້ກີບ, ຊຶ່ງປະກອບມີຫ້ອງການ, ສະໂມສອນ ແລະ ຫໍພັກຄູ-ອາຈານ ແລະ ໄດ້ຮັບການຊີ້ນໍາຢ່າງໃກ້ສິດຈາກສະຖານທູດຈີນ ປະຈຳລາວ ແລະ ຄະນະນຳມະຫາວິທະຍາໄລແຫ່ງຊາດ ເພື່ອບັນລຸໄດ້ຕາມມາດຕະຖານວາງໄວ້ ແລະ ຄາດວ່າໂຄງການກໍ່ສ້າງດັ່ງກ່າວ ຈະສຳເລັດກ່ອນຄາດໝາຍທີ່ວາງໄວ້.
ໃນຂະນະດຽວກັນ, ທ່ານ ນາງ ກາວ ຢ້ຽນ ກໍໄດ້ສະແດງຄວາມຍ້ອງຍໍຊົມເຊີຍ ແກ່ຄະນະນຳ ມະຫາວິທະຍາໄລແຫ່ງຊາດ ທີ່ໃຫ້ຄວາມເອົາໃຈໃສ່ຕິດຕາມໂຄງການກໍ່ສ້າງດັ່ງກ່າວ ແລະ ຫວັງຢ່າງຍິ່ງວ່າ ຖ້າສ້າງອາຄານສຳເລັດແລ້ວຈະມີນັກສຶກສາເປັນຈຳນວນຫຼາຍໄດ້ເຂົ້າສຶກສາພາສາຮໍ່າຮຽນ ແລະ ວັດທະນະທຳຂອງຈີນໃນສະຖາບັນແຫ່ງນີ້ດ້ວຍຄວາມສະດວກສະບາຍ.
