ສປປ ເກົາຫລີ ຜະເຊີນບັນຫານ້ຳມັນຂາດເຂີນ-ລາຄາເພີ່ມຂຶ້ນ 2 ທົບ
ພຽງຢາງ 26 ເມສາ: ສປປ ເກົາຫລີ ຜະເຊີນບັນຫານ້ຳມັນຂາດເຂີນ, ທາງການສັ່ງຈຳກັດປະລິມານຈ່າຍນ້ຳມັນ, ປ້ຳນ້ຳມັນຫລາຍແຫ່ງປິດໃຫ້ບໍລິການ ຂະນະທີ່ລາຄານ້ຳມັນເພີ່ມສູງຂຶ້ນເກືອບສອງທົບ.
ລາຍງານລະບຸວ່າ: ປ້ຳນ້ຳມັນຫລາຍແຫ່ງຢູ່ນະຄອນຫລວງພຽງຢາງເລີ່ມປິດໃຫ້ບໍລິການແຕ່ວັນທີ 19 ເມສາ ໂດຍບາງແຫ່ງມີການຕັ້ງສິ່ງກີດຂວາງບໍລິເວນທາງເຂົ້າ, ຂະນະທີ່ບາງແຫ່ງລະບຸວ່າບໍ່ມີພະນັກງານຕື່ມນ້ຳມັນ, ສ່ວນປ້ຳທີ່ເປີດໃຫ້ບໍລິການກໍມີຊາວນະຄອນຫລວງພຽງຢາງຈຳນວນຫລາຍຂີ່ລົດໄປເຂົ້າຄິວລໍຖ້າຈົນແຖວຍາວລົ້ນອອກນອກປ້ຳ ສາເຫດບັນຫານ້ຳມັນຂາດເຂີນຢູ່ເມືອງຫລວງຂອງ ສປປ ເກົາຫລີ ຍັງບໍ່ຮູ້ແນ່ນອນ ແລະ ບໍ່ມີໃຜຮູ້ວ່າ: ທາງການຈະມີການຈຳກັດປະລິມານການຈ່າຍນ້ຳມັນໃຫ້ແກ່ປະຊາຊົນໄປຮອດໃສ.
ສ່ວນລາຄານ້ຳມັນກໍເພີ່ມສູງຂຶ້ນຈາກລາຄາປົກກະຕິ ໂດຍປັດຈຸບັນນີ້ລາຄາປີ້ຕື່ມນ້ຳມັນ 15 ກິໂລກຣາມ ປະມານ 23 ໂດລາສະຫະລັດ ຈາກປົກກະຕິປະມານ 13 ໂດລາສະຫະລັດ.
