ຄະນະພາຣາແລມປິກອາຊີຢ້ຽມຍາມ

ໃນວັນທີ 16 ພຶດສະພາ ທີ່ກົມກິລາມວນຊົນ ກະຊວງສຶກສາທິການ ແລະ ກິລາ ໄດ້ມີພິທີຕ້ອນຮັບການຢ້ຽມຢາມຂອງທ່ານ Majid Rashed ປະທານຄະນະພາຣາແລມປິກອາຊີ  ພ້ອມດ້ວຍຄະນະ ໂດຍໃຫ້ກຽດຕ້ອນຮັບຂອງທ່ານ ສີທາດ ຈັນທະບູລີ ຮອງປະທານເລຂາທິການ NPC of Laos ແລະ ທັງເປັນຫົວໜ້າກົມກິລາກາຍະກໍາມວນຊົນ ກະຊວງສຶກສາທິການ ແລະ ກິລາ ພ້ອມດ້ວຍບັນດາຄະນະນໍາກົມກິລາມວນຊົນເຂົ້າຮ່ວມ.

ໃນໂອກາດດັ່ງກ່າວ, ທ່ານ ສີທາດ ຈັນທະບູລີ ກ່າວວ່າ: ລາວເປັນອີກປະເທດໜຶ່ງທີ່ໄດ້ຮັບຜົນກະທົບຈາກສົງຄາມ, ໄພທໍາມະຊາດ ແລະ ອື່ນໆ ເປັນຕົ້ນຖືກລະເບີດປະເພດຕ່າງໆທີ່ຍັງບໍ່ທັນແຕກທີ່ຍັງຝັງຢູ່ສະຖານທີ່ຕ່າງໆ ເຊິ່ງເປັນສາເຫດເຮັດໃຫ້ຄົນລາວຂອງພວກເຮົາໄດ້ຮັບຜົນກະທົບຢ່າງຮ້າຍແຮງ. ສະນັ້ນ, ລັດຖະບານໄດ້ເຫັນຄວາມສໍາຄັນຫລາຍຕໍ່ການຟື້ນຟູຈິດໃຈຂອງຄົນພິການລາວ, ລັດຖະບານລາວຈຶ່ງໄດ້ມີແນວທາງນະໂຍບາຍ ແລະ ເອົາໃຈໃສ່ຊຸກຍູ້ຄົນພິການລາວໃຫ້ມີການປະກອບສ່ວນເຂົ້າໃນຂະບວນການເຄື່ອນໄຫວຂອງລັດ, ພ້ອມທັງສົ່ງເສີມຄວາມສະເໝີພາບເທົ່າທຽມກັນກັບຄົນປົກກະຕິທົ່ວໄປ ແລະ ມີສິດໄດ້ຮັບການສຶກສາ, ສ້າງອາຊີບທີ່ໝັ້ນຄົງ. ນອກຈາກນັ້ນ ຍັງໄດ້ສົ່ງເສີມຄົນພິການຫັນມາຫລິ້ນກິລາ-ກາຍະກໍານັບມື້ນັບຫລາຍຂຶ້ນ ເຊິ່ງມາຮອດປັດຈຸບັນກິລາຄົນພິການໄດ້ມີການຈັດຕັ້ງເຄື່ອນໄຫວແຂ່ງຂັນຢູ່ລາວ 8 ປະເພດຄື: ກິລາຍົກນໍ້າໜັກ, ແລ່ນ-ລານ, ລອຍນໍ້າ, ໂກນບານ, ບານບ້ວງລໍ້ເລື່ອນ, ບານເຕະ, ຈານບິນ ແລະ ກິລາປິ່ງປ໋ອງ.

ໃນໂອກາດສຸດທ້າຍ, ທ່ານ ສີທາດ ຈັນທະບູລີ ໄດ້ກ່າວວ່າ: ຂ້າພະເຈົ້າໃນນາມຕາງໜ້າກະຊວງສຶກສາທິການ ແລະ ກິລາ ຮູ້ສຶກເປັນກຽດຢ່າງຍິ່ງ ແລະ ເປັນກຽດຢ່າງສູງທີ່ໄດ້ຕ້ອນຮັບທ່ານປະທານພາຣາແລມປິກອາຊີ ພ້ອມດ້ວຍຄະນະທີ່ມາຢ້ຽມຢາມ ສປປ ລາວ.