ຈຳປາສັກກວດພົບນໍ້າມັນເຄື່ອງຮອນດາແລະຄູໂບຕາປອມ

ຕາມການລາຍງານຂອງ ໜັງສືພິມຈຳປາໃໝ່ວ່າ:  ໃນວັນທີ 8 ພຶດ ສະພານີ້, ຂະແໜງການພາກລັດຂອງແຂວງຈໍາປາສັກ ແລະ ພາກສ່ວນບໍລິສັດເຈົ້າຂອງລິຂະສິດຜູ້​ຜະລິດ​ນ້ຳມັນ​ເຄື່ອງ​ຍີ່​ຫໍ້ຮອນ​ດາ ​ແລະ ຄູ​ໂບຕາ ໄດ້ລົງກວດກາຕາມຮ້ານຂາຍເຄື່ອງອາໄຫຼ່, ອູ່ສ້ອມແປງລົດຕ່າງໆຢູ່ເຂດເມືອງປາກຊ່ອງ​ແຂວງ​ດັ່ງກ່າວ ເຊິ່ງໄດ້ພົບເຫັນນ້ຳມັນເຄື່ອງຮອນດາ ແລະ ຄູໂບຕາ ປອມແປງລິຂະສິດວາງຈຳໜ່າຍເປັນຈຳນວນຫຼາຍ. ຂະນະທີ່ບໍລິ ສັດຜູ້​ຜະລິດໄດ້ອອກມາເຕືອນເຖິງຜົນຮ້າຍໃນການນຳໃຊ້ນ້ຳມັນເຄື່ອງປອມຈະມີຜົນເສຍຮ້າຍແຮງຕໍ່ເຄື່ອງຈັກ.

ທ່ານ ນາງ ດາວວຽງນະຄອນ ເດດສີດາຈັນ ທີ່ປຶກສາທາງດ້ານກົດໝາຍຂອງບໍລິສັດຮອນດາ ແລະ ບໍລິສັດຄູໂບຕາ ໃຫ້ສຳພາດວ່າ: ປີ 2017 ຜ່ານມາ, ເຈົ້າໜ້າທີ່ກ່ຽວຂ້ອງຂອງແຂວງຈຳປາສັກ ສົມທົບກັບບໍລິສັດຄູໂບຕາ ແລະ ບໍລິສັດຮອນດາ ກວດພົບນ້ຳມັນເຄື່ອງຄູໂບຕາທີ່ໃຊ້ກັບລົດໄຖນາເດີນຕາມ ແລະ ນ້ຳມັນເຄື່ອງຮອນດາທີ່ໃຊ້ກັບລົດ 4 ຈັງຫວະ, 2 ຈັງຫວະປອມແປງລິຂະສິດຈຳນວນຫຼາຍ. ເພາະສະນັ້ນ, ທາງບໍລິສັດຈຶ່ງໄດ້ສົມທົບກັບພະແນກວິ ທະຍາສາດ ແລະ ເຕັກໂນໂລຊີແຂວງຈຳປາສັກ, ອົງການໄອຍະການປະຊາຊົນແຂວງ, ເຈົ້າໜ້າທີ່ຕຳຫຼວດ ແລະ ພາກສ່ວນທີ່ກ່ຽວຂ້ອງ ລົງກວດກາເພື່ອເກັບຄືນສິນຄ້າປອມແປງລອກຮຽນແບບດັ່ງກ່າວທີ່ຫຼົງເຫຼືອຢູ່ໃນເມືອງຕ່າງໆຂອງແຂວງຈຳປາສັກ ໂດຍສະ ເພາະຢູ່ເມືອງປາກຊ່ອງທີ່ວາງຂາຍຢູ່ຕາມຮ້ານຂາຍເຄື່ອງອາໄຫຼ່, ຮ້ານແປງລົດຈຳນວນ 10 ກວ່າຮ້ານ, ໄດ້ພົບເຫັນນ້ຳມັນເຄື່ອງຄູໂບຕາປອມຈຳນວນ 77 ກະຕຸກ (ຕຸກລະ 3 ລິດ), ນ້ຳມັນເຄື່ອງຮອນດາເກືອບ 500 ຕຸກ (ຕຸກລະ 1 ລິດ) ເຊິ່ງເຈົ້າໜ້າທີ່ໄດ້ກັກຍຶດໄວ້ເພື່ອນຳໄປທຳລາຍຖິ້ມ. ດັ່ງນັ້ນ ຈຶ່ງຂໍຝາກເຖິງຜູ້​ບໍລິໂພກຕ້ອງລະວັງໃນການຊົມໃຊ້ ເພາະນ້ຳມັນເຄື່ອງປອມເຊິ່ງເປັນນ້ຳມັນທີ່ບໍ່ໄດ້ຜ່ານການຜະລິດຈາກໂຮງງານ, ບໍ່ໄດ້ຮັບການຢັ້ງຢືນຄຸນນະພາບ. ຖ້າເຮົາເອົາໄປນຳໃຊ້ມັນຈະນຳຜົນເສຍຫາຍມາສູ່ເຄື່ອງຈັກເຊັ່ນ: ເຄື່ອງຈັກທຳມະດາມີອາຍຸການນຳໃຊ້ 10 ປີ ກໍຈະຍັງເຫຼືອພຽງ 1-3 ປີ. ທີ່ສໍາຄັນມັນເຮັດໃຫ້ບໍລິສັດຜູ້​ຜະລິດທີ່ໄດ້ຈົດທະບຽນລິຂະສິດຢ່າງຖືກຕ້ອງທາງດ້ານກົດໝາຍໄດ້ຮັບຄວາມເສຍຫາຍເປັນມູນຄ່າສູງ.

ໜ່ວຍງານທີ່ກ່ຽວຂ້ອງຂອງພະແນກວິທະຍາສາດ ແລະ ເຕັກໂນໂລຢີແຂວງຈຳປາສັກ ເປີດເຜີຍຕື່ມວ່າ: ສຳລັບສິນຄ້າປອມແປງລອກຮຽນແບບເຄື່ອງໝາຍການຄ້າດັ່ງກ່າວ ທາງເຈົ້າໜ້າທີ່ກ່ຽວຂ້ອງຈະໄດ້ກັກຢຶດໄວ້ເພື່ອນຳໄປທຳລາຍຖິ້ມ, ພ້ອມທັງສຶກສາອົບຮົມ, ກ່າວເຕືອນ ແລະ ເຮັດບົດບັນທຶກກັບຜູ້ທີ່ມີໄວ້ຈຳໜ່າຍ ເຊິ່ງຖ້າພົບເຫັນອີກແມ່ນຈະໄດ້ດຳເນີນຄະດີຕາມລະບຽບກົດໝາຍ. ສຳລັບວິທີສັງເກດເບື້ອງຕົ້ນນ້ຳມັນເຄື່ອງຂອງແທ້ຂອງຄູໂບຕາ ແລະ ຮອນດາ ເຄື່ອງໝາຍການຄ້າຂອງສິນຄ້າຈະມີລັກສະນະກົມກືນກັບກະຕຸກ, ກາຂອງຜະລິດຕະພັນຈະຊັດເຈນ, ການຫຸ້ມຫໍ່ໄດ້ມາດດຕະຖານ ແລະ ມີບາໂຄດຕິດໃນກະຕຸກຢ່າງຊັດເຈນ ເຊິ່ງທ່ານໃດຫາກສົນໃຈຂໍ້ມູນເພີ່ມຕື່ມກໍສາມາດເຂົ້າມາສອບຖາມລາຍລະອຽດໄດ້ທີ່ພະແນກວິທະຍາສາດ ແລະ ເຕັກໂນໂລຍີແຂວງຈຳປາສັກ.