ລົດແກ້ວ ຫວັງຕິດ 1 ໃນ 3 ອຸດອນ ຮາຟມາຣາທອນ ທ້າຍເດືອນພຶດສະພານີ້
ນາງ ລົດແກ້ວ ອິນທະກຸມມານ ນັກກິລາແລ່ນທີມຊາດລາວ ທີ່ມີຜົນງານດີຕໍ່ເນື່ອງ ຫລ້າສຸດກຽມເຂົ້າຮ່ວມ ອຸດອນ ຮາຟມາຣາທອນ ທີ່ຈະຈັດຂຶ້ນທ້າຍເດືອນພຶດສະພານີ້ ທີ່ແຂວງອຸດອນ ປະເທດໄທ ໂດຍຕັ້ງເປົ້າຕ້ອງຕິດ 1 ໃນ 3 ທັງນີ້ເພື່ອກຽມຄວາມພ້ອມເຂົ້າຮ່ວມເອຊຽນເກມທີ່ຈະຈັດຂຶ້ນເດືອນສິງຫາ 2018 ນີ້.
ຕາມການໃຫ້ສໍາພາດຂອງນາງ ລົດແກ້ວ ອິນທະກຸມມານ ວ່າ: ການເຂົ້າຮ່ວມແຂ່ງຂັນ ອຸດອນ ຮາຟມາຣາທອນ ຈະຈັດຂຶ້ນໃນວັນທີ 27 ພຶດສະພານີ້ ເຊິ່ງເປັນອີກລາຍການໜຶ່ງທີ່ຈະເປັນການທົດສອບຄວາມສາມາດຂອງຕົນເອງອີກຄັ້ງ ພາຍຫລັງທີ່ຍາດໄດ້ 2 ຫລຽນເງິນໃນລາຍການແຂ່ງຂັນສິງກະໂປໂອເພັນ 2018 ທ້າຍເດືອນເມສາຜ່ານມານີ້. ສໍາລັບການເຂົ້າຮ່ວມແຂ່ງຂັນ ອຸດອນ ຮາຟມາຣາທອນ ຄັ້ງນີ້ ຕົນເອງໄດ້ຕັ້ງເປົ້າຫວັງຕິດ 1 ໃນ 3 ເພື່ອສ້າງຊື່ສຽງໃຫ້ແກ່ວົງການກິລາຂອງບ້ານເຮົາອີກຄັ້ງ. ນອກຈາກນີ້ ການເຂົ້າຮ່ວມລາຍການດັ່ງກ່າວຍັງເປັນການຝຶກຊ້ອມເພື່ອກຽມຄວາມພ້ອມເຂົ້າຮ່ວມການແຂ່ງຂັນເອຊຽນເກມທີ່ຈະຈັດຂຶ້ນທີ່ປະເທດອິນໂດເນເຊຍ.
