ປາແລັສຕິນລຸກຮື້ຂຶ້ນຕໍ່ຕ້ານເປີດ ສະຖານທູດອາເມລິກາຢູ່ເຢລູຊາເລມ
ຊາວປາແລັສຕິນຫລາຍໝື່ນຄົນພະຍາຍາມບຸກຝ່າແນວກັ້ນຊາຍແດນເຂດກາຊາກັບອິດສະລາແອນ ເພື່ອປະທ້ວງການເປີດສະຖານທູດອາເມລິກາໃນເຢລູຊາເລມ. ຂະນະທີ່ທະຫານອິດສະລາແອນພະຍາຍາມປາບປາມຢ່າງໜັກ ຈົນມີຜູ້ເສຍຊີວິດ 52 ຄົນ ແລະ ບາດເຈັບນັບພັນຄົນ.
ສຳນັກຂ່າວຕ່າງປະເທດລາຍງານວ່າ: ຄວາມພະຍາຍາມຂອງຊາວປາແລັສຕິນຫລາຍໝື່ນຄົນໃນການບຸກຝ່າຂ້າມຮົ້ວກັ້ນຊາຍແດນເຂດກາຊາກັບອິດສະລາແອນ ເພື່ອຕໍ່ຕ້ານການເປີດສະຖານທູດອາເມລິກາໃນເຢລູຊາເລມ ໃນວັນທີ 14 ພຶດສະພາ ກາຍເປັນເຫດນອງເລືອດຢ່າງວ່ອງໄວ, ພາຍຫລັງທະຫານອິດສະລາແອນຕອບໂຕ້ດ້ວຍຄວາມຮຸນແຮງ ໂດຍໃຊ້ທັງລູກປືນແທ້ ແລະ ແກັສນ້ຳຕາ.
ຂ່າວລະບຸວ່າ: ຮອດເວລາ 16:30 ໂມງ ຕາມເວລາທ້ອງຖິ່ນ ມີຊາວປາແລັສຕິນເສຍຊີວິດໃນເຫດຄວາມຮຸນແຮງຄັ້ງຫລ້າສຸດນີ້ແລ້ວຢ່າງໜ້ອຍ 43 ຄົນ ຫລາຍຄົນເປັນໄວລຸ້ນ ແລະ ມີຜູ້ບາດເຈັບອີກຫລາຍກວ່າ 2.700 ຄົນ ແຕ່ຫລ້າສຸດສື່ທ້ອງຖິ່ນລະບຸວ່າຈຳນວນຜູ້ເສຍຊີວິດເພີ່ມເປັນ 55 ຄົນແລ້ວ.
ນອກຈາກນີ້, ກອງກຳລັງປ້ອງກັນອິດສະລາແອນ ອອກຖະແຫລງການວ່າ: ປະຕິບັດດ້ານຄວາມໝັ້ນຄົງຂອງເຈົ້າໜ້າທີ່ປ້ອງກັນອິດສະລາແອນຕາມຊາຍແດນທີ່ຕິດກັບເຂດກາຊາ ແລະ ເວສແບງ “ເປັນໄປຕາມກົດໝາຍສາກົນ” ແລະ “ມາດຕະຖານສາກົນ” ຈາກກຸ່ມຜູ້ພະຍາຍາມກໍ່ຄວາມບໍ່ສະຫງົບ ໂດຍການໃຊ້ອາວຸດຮ້າຍແຮງກັບເຈົ້າໜ້າທີ່ ແລະ ພະຍາຍາມຂ້າມຊາຍແດນ.
