ເຈົ້າຄອງນະຄອນລົງຕິດຕາມຄວາມຄືບໜ້າການກໍ່ສ້າງໂຮງໝໍມິດຕະພາບ
ໃນວັນທີ 11 ພຶດສະພານີ້, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ ພ້ອມດ້ວຍຄະນະ, ໄດ້ລົງຕິດຕາມຄວາມຄືບໜ້າຂອງໂຄງການກໍ່ສ້າງໂຮງໝໍມິດຕະພາບທີ່ໄດ້ລົງມືກໍ່ສ້າງມາແຕ່ຕົ້ນປີ 2016, ໂດຍການຕ້ອນຮັບຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ.
ໂຄງການດັ່ງກ່າວ, ແມ່ນໂຄງການຂະຫຍາຍໃຫ້ສາມາດບັນຈຸຕຽງນອນໃຫ້ໄດ້308 ຕຽງ ແລະ ເພີ່ມຄວາມທັນສະໄໝຂອງໂຮງໝໍດັ່ງກ່າວໃນ 4 ຊັ້ນປະກອບດ້ວຍຫ້ອງກວດພະຍາດ, ຫ້ອງຜ່າຕັດ, ຫ້ອງນອນ ແລະ ອຸປະກອນການແພດອື່ນໆ ທີ່ໄດ້ມາດຕະຖານຂອງເອີຣົບ, ຄາດວ່າການກໍ່ສ້າງຈະສຳເລັດໃນເດືອນ ກໍລະກົດ 2018 ນີ້, ພ້ອມຈະເລີ່ມເປີດທົດລອງນຳໃຊ້.
ໃນໂອກາດຢ້ຽມຢາມ, ທ່ານ ສິນລະວົງ ຄຸດໄພທູນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄວາມຄືບໜ້າໂຄງການດັ່ງກ່າວ ເພາະເປັນບາດກ້າວໃໝ່ດ້ານວຽກງານສາທາລະນະສຸກທີ່ຈະຊ່ວຍໃຫ້ການບໍລິການ ແລະ ການປິ່ນປົວມີຄວາມສະດວກ ແລະ ທັນສະໄໝ, ເປັນໂຮງໝໍທັນສະໄໝແຫ່ງທຳອິດໃນ ສປປ ລາວ.
ໃນຂະນະດຽວກັນ, ທາງໂຄງການຍັງໄດ້ນໍາສະເໜີແຜນການກໍ່ສ້າງເສັ້ນທາງເຂົ້າສູ່ໂຮງໝໍດັ່ງກ່າວທີ່ມີໄລຍະທາງ 800 ແມັດ ເພື່ອອຳນວຍຄວາມສະດວກໃນການໄປ-ມາ ແລະ ພ້ອມນັ້ນ ທ່ານເຈົ້າຄອງຍັງໄດ້ກວດກາໂຄງສ້າງຂອງຕຶກໂຮງໝໍມິດຕະພາບຫລັງເກົ່າເພື່ອວາງແຜນບູລະນະຄືນໃໝ່.
