ປກສ ເອັຟຊີ ຊະນະ ດີເຄ ເອັຟຊີ 3-0 ບານເຕະເປບຊີ ລາວພຣີເມຍລີກ
ວັນທີ 12 ພຶດສະພານີ້ ທີ່ສະໜາມກິລາມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ໄດ້ມີການແຂ່ງຂັນບານເຕະ ເປບຊີ ລາວ ພຣີເມຍລີກ ລະດູການ 2018 ນັດຕົກຄ້າງໃນຮອບຂາໄປ ລະຫວ່າງ ສະໂມສອນ ດີເຄ ເອັຟຊີ ທີມອັນດັບ 6 ຂອງຕາຕະລາງ ເປີດສະໜາມຕ້ອນຮັບການມາຢາມຂອງສະໂມສອນ ປກສ ເອັຟຊີ ທີມອັນດັບ 5 ຂອງຕາຕະລາງຄະແນນ.
ເລີ່ມເກມການແຂ່ງຂັນໃນເຄິ່ງເວລາທຳອິດ ເປັນທາງດ້ານ ສະໂມສອນ ປກສ ທີ່ຫລິ້ນໄດ້ດີກວ່າ ແລະ ມີໂອກາດໄດ້ປະຕູຂຶ້ນນຳຫລາຍຄັ້ງ. ແນວໃດກໍຕາມ ຄວາມພະຍາຍາມຂອງ ປກສ ມາປະສົບຜົນສຳເລັດເມື່ອໄດ້ປະຕູຂຶ້ນນຳ 1-0 ໃນໄລຍະເຄິ່ງເວລາທໍາອິດ ຈາກການຍິງຂອງທ້າວ ສີນວນ ຊາມຸນຕີ ເຮັດໃຫ້ ປກສ ເອັຟຊີ ຂຶ້ນນໍາ 1-0 ແລະ ເຂົ້າສູ່ເຄິ່ງເວລາທີສອງ ສະໂມສອນ ປກສ ຍັງສືບຕໍ່ຍິງປະຕູຂຶ້ນນໍາອີກ 2 ປະຕູ ຈາກລູກຍິງຂອງທ້າວ ຕີ່ນີ ແລະ ທ້າວ ສີນວນ ຊາມຸນຕີ. ຈົບເກມການແຂ່ງຂັນ ສະໂມສອນ ປກສ ເອັຟຊີ ບຸກມາເອົາຊະນະ ສະໂມສອນ ດີເຄ ເອັຟຊີ ໄປແບບຂາດຮອຍ 3-0 ປະຕູ ເກັບເພີ່ມເປັນ 9 ຄະແນນ ຈາກ 5 ນັດ ຫຍັບຂຶ້ນໄປຢູ່ອັນດັບ 2 ແລະ ມີຄະແນນຕາມຫລັງ ສະໂມສອນ ລາວໂຕໂຢຕາ ເອັຟຊີ 7 ຄະແນນ ແຕ່ແຂ່ງໜ້ອຍກວ່າ 2 ນັດ, ສ່ວນ ດີເຄ ເອັຟຊີ ລົງສະໜາມໄປແລ້ວ 6 ນັດ ມີ 6 ຄະແນນ.
