ຢູ 16 ລາວ ຍາດໄດ້ອັນດັບ 4 ໃນລາຍການຊີງແຊ້ມອາຊຽນ 2018
ນັກກິລາຍິງທີມຊາດລາວລຸ້ນອາຍຸບໍ່ເກີນ 16 ປີ ຫລື ຢູ 16 ຍາດໄດ້ອັນດັບທີ 4 ພາຍຫລັງເສຍຈຸດໂທດໃຫ້ແກ່ທີມຊາດຫວຽດນາມ 3-0 ໃນການແຂ່ງຂັນເຕະບານຍິງຊີງແຊ້ມອາຊຽນ ລຸ້ນອາຍຸ 16 ປີ ຫລື AFF U-16 GIRLS’ CHAMPIONSHIP 2018 ຢູ່ປະເທດອິນໂດເນເຊຍ ໃນລະຫວ່າງວັນທີ 1-13 ພຶດສະພາ 2018.
ການແຂ່ງຂັນເຕະບານຍິງຊີງແຊ້ມອາຊຽນ ລຸ້ນອາຍຸ 16 ປີ ຫລື AFF U-16 GIRLS’ CHAMPIONSHIP 2018 ມີທີມເຂົ້າຮ່ວມທັງໝົດ 9 ປະເທດ ແບ່ງອອກເປັນ 2 ກຸ່ມຄື: ກຸ່ມເອ ປະກອບມີ: ຟີລິບປິນ, ມຽນມາ, ຫວຽດນາມ, ມາເລເຊຍ ແລະ ສິງກະໂປ, ສ່ວນກຸ່ມບີ ປະກອບມີ: ໄທ, ກຳປູເຈຍ, ລາວ ແລະ ອິນໂດເນເຊຍ (ເຈົ້າພາບ).
ຂະນະທີ່ທີມຊາດລາວລົງສະໜາມ 3 ຄັ້ງ ຊະນະ 2 ຄັ້ງ ເສຍ 1 ຄັ້ງ ລວມມີ 6 ຄະແນນ ສົ່ງຜົນເຂົ້າຮອບຮອງຊະນະເລີດໃນຖານະອັນດັບທີ 2 ຂອງກຸ່ມບີ ລົງສະໜາມພົບກັບທີມຊາດມຽນມາ ທີມອັນດັບທີ 1 ຂອງກຸ່ມເອ ຜ່ານການແຂ່ງຂັນທີມຊາດລາວເສຍໃຫ້ທີມຊາດມຽນມາ 4-5 ເຮັດໃຫ້ທີມຊາດລາວຕ້ອງລຸ້ນອັນດັບທີ 3 ກັບທີມຊາດຫວຽດນາມ ໃນວັນທີ 13 ພຶດສະພາຜ່ານມານີ້ ແຕ່ໂຊກບໍ່ເຂົ້າຂ້າງທີມຊາດລາວເສຍໃຫ້ແກ່ທີມຊາດຫວຽດນາມ 3-0 ຍາດໄດ້ພຽງແຕ່ອັນດັບທີ 4 ຂອງການແຂ່ງຂັນເທົ່ານັ້ນ.
