ແຟນບານ ຮຳບວກ ສ້າງຄວາມວຸ້ນວາຍ ບໍ່ພໍໃຈກັບຜົນງານຂອງທີມໃນລະດູການນີ້

ຮຳບວກ (Hamburger SV) ສະໂມສອນເກົ່າແກ່ໃນວົງການບານເຕະເຢຍລະມັນ ສ້າງອາລົມຄວາມເສຍໃຈ ແລະ ຄວາມຜິດຫວັງໃຫ້ແຟນບານແບບບໍ່ເຄີຍມີມາ ເມື່ອທີມຕົກຊັ້ນຈາກລີກສູງສຸດ (ບຸນເດັສລີກ້າ 1) ຄັ້ງທຳອິດ ໃນຮອບ 54 ປີ ໃນວັນທີ 12 ພຶດສະພານີ້ ນັດສຸດທ້າຍເຖິງວ່າທີມເປີດບ້ານຊະນະ ໂບຣຸສເຊຍມຸນເຊິນກລັດບັດ(Borussia Mönchengladbach) ແຕ່ກໍບໍ່ພຽງພໍໃຫ້ທີມລອດຕົກຊັ້ນ ມີພຽງ 31 ຄະແນນຈາກ 34 ນັດ ຢູ່ອັນດັບຮອງສຸດທ້າຍຂອງຕາຕະລາງ.

ຕໍ່ກັບຜົນງານດັ່ງກ່າວ ເຮັດໃຫ້ແຟນບານຈຳນວນຫລາຍບໍ່ພໍໃຈ ເກີດອາລົມຮຸນແຮງແກວ່ງບັ້ງໄຟດອກ ​ເຊິ່ງເປັນວັດຖຸຕ້ອງຫ້າມລົງມາສະຫນາມ ເພື່ອປະທ້ວງຄະນະບໍລິຫານ ແລະ ຜົນງານຂອງຄະນະຄູຝຶກ ແລະ ນັກກິລາ.

ຮຳບວກ ເປັນຫນຶ່ງໃນສະໂມສອນທີ່ເກົ່າແກ່ທີ່ສຸດໃນເຢຍລະມັນ ສ້າງຕັ້ງຂຶ້ນໃນວັນທີ 29 ກັນຍາ 1887 ລວມ 130 ປີ. ຜົນງານຜ່ານມາເຄີຍຄວ້າແຊ້ມລີກສູງສຸດ 6 ສະໄຫມ ຮອງແຊ້ມ 8 ສະໄຫມ, ເປັນແຊ້ມ ເດເອຟເບ ໂພຄາວ(DFB-Pokal) 3 ສະໄຫມ ຮອງແຊ້ມ 3 ສະໄຫມ, ແຊ້ມຊຸບເປີຄັບເຢຍລະມັນ (DFB-Supercup) 3 ສະໄຫມ, ຢູໂຣປ້ຽນຄັບ ຫລື ຢູຟ້າແຊ້ມປ້ຽນລີກ 1 ສະໄຫມ(1982–83) ແລະ ຢູຟ້າ ອິນເຕີໂຕໂຕ້ຄັບ (UEFA Intertoto Cup) 2 ສະໄຫມ (ປັດຈຸບັນບໍ່ມີລາຍການນີ້ແລ້ວ).