ປ່ອຍຕົວທ່ານ ອັນວາ ອິບຣາຮິມ ອັງຄານນີ້
ສຳນັກຂ່າວຕ່າງປະເທດລາຍງານໃນວັນທີ 12 ພຶດສະພາວ່າ: ນາງ ນຸຣູລ ອິຊຊາ ລູກຂອງທ່ານ ອັນວາ ອິບຣາຮິມ ຜູ້ນຳຝ່າຍຄ້ານມາເລເຊຍ ເປີດເຜີຍວ່າ: ພໍ່ຂອງນາງຈະໄດ້ຮັບການປ່ອຍຕົວໃຫ້ເປັນອິດສະຫລະໃນວັນທີ 15 ພຶດສະພານີ້ ໂດຍຢືນຢັນຜ່ານການສົ່ງຂໍ້ຄວາມສັ້ນວ່າເປັນຄວາມຈິງ ເຊິ່ງກ່ອນໜ້ານີ້, ທ່ານ ດຣ. ມະຫາເທ ນາຍົກລັດຖະມົນຕີຄົນໃໝ່ຂອງມາເລເຊຍ ກ່າວວ່າຈະດຳເນີນການທຸກຢ່າງເພື່ອໃຫ້ມີການປ່ອຍຕົວທ່ານ ອັນວາ ອິບຣາຮິມ ເຊິ່ງອາດເຄີຍເປັນຝ່າຍກົງກັນຂ້າມກັນມາກ່ອນ ໂດຍໃຫ້ມີຜົນທັນທີ ໂດຍການຂໍອະໄພຍະໂທດ ເຊິ່ງລູກຂອງທ່ານ ອັນວາ ເປີດເຜີຍອີກວ່າ: ການຂໍອະໄພຍະໂທດນັ້ນຍຶດຂໍ້ອ້າງວ່າເປັນການຕັດສິນຜິດພາດ.
ທ່ານ ອັນວາ ອິບຣາຮິມ ຜູ້ນຳຝ່າຍຄ້ານມາເລເຊຍ ຖືກຕັດສິນຈຳຄຸກຂໍ້ຫາປະພຶດຜິດທາງເພດ ເຊິ່ງເປັນຂໍກ່າວຫາທີ່ທ່ານ ແລະ ຜູ້ສະໜັບສະໜູນອ້າງວ່າມີການເມືອງແອບແຝງ.
ນອກຈາກນີ້, ສຳນັກງານກວດຄົນເຂົ້າເມືອງມາເລເຊຍ ຢືນຢັນວ່າ: ທ່ານ ນາຈິບ ຣາຊັກ ອະດີດນາຍົກລັດຖະມົນຕີມາເລເຊຍ ທີ່ຖືກໂຄ່ນອຳນາດລົງໃນການເລືອກຕັ້ງຄັ້ງປະຫວັດສາດ 10 ພຶດສະພາ ຖືກຂຶ້ນບັນຊີດຳບໍ່ໃຫ້ເດີນທາງອອກນອກປະເທດ ຈາກກໍລະນີກອງທຶນ 1MDB ຂອງລັດຖະບານ ເຊິ່ງທ່ານ ນາຈິບ ຖືກກ່າວຫາວ່າສໍ້ໂກງເງິນຈາກກອງທຶນເຂົ້າຖົງຕົນເອງ 700 ລ້ານໂດລາສະຫະລັດ ແຕ່ທ່ານປະຕິເສດ.
