ພັກອຳໂນຍອມຮັບການເສຍໄຊ ເລືອກຕັ້ງມາເລເຊຍ
ພັກມາລາຢູສາມັກຄີແຫ່ງຊາດ ຫລື ອຳໂນ ເຊິ່ງຜູກຂາດການເປັນລັດຖະບານມາເລເຊຍຍາວນານ 16 ປີ ປະກາດຍອມຮັບການເສຍໄຊໃນການເລືອກຕັ້ງທົ່ວໄປ ໃນວັນທີ 9 ພຶດສະພາ ເຊິ່ງເປັນການກັບມາຍິ່ງໃຫຍ່ຂອງທ່ານ ດຣ. ມະຫາເທ ໂມຮຳໝັດ.
ສຳນັກຂ່າວຕ່າງປະເທດລາຍງານວ່າ: ທ່ານ ນາຈິບ ຣາຊັກ ຫົວໜ້າພັກມາລາຢູສາມັກຄີແຫ່ງຊາດ (ອຳໂນ) ເຊິ່ງເປັນແກນນຳຂອງພັນທະມິດ 13 ພັກໃນນາມ ແນວຮ່ວມແຫ່ງຊາດ (ບີເອັນ) ຖະແຫລງຢູ່ສຳນັກງານໃຫຍ່ຂອງພັກອຳໂນ ໃນນະຄອນຫລວງກົວລາລຳເປີ ຍອມຮັບຄຳພິພາກສາຂອງປະຊາຊົນ, ແຕ່ສະຖານະການທີ່ເກີດຂຶ້ນກັບແນວຮ່ວມບີເອັນໃນຄັ້ງນີ້ ຖືເປັນເຄື່ອງພິສູດໄດ້ຢ່າງຈະແຈ້ງວ່າ: ຂ່າວລືວ່າຝ່າຍລັດຖະບານພະຍາຍາມໃຊ້ເລ່ຫລ່ຽມເພື່ອຮັກສາອຳນາດໄວ້ນັ້ນ ບໍ່ເປັນຄວາມຈິງ.
ຜົນການເລືອກຕັ້ງແຫ່ງຊາດຄັ້ງທີ 14 ໃນວັນທີ 9 ພຶດສະພາ ເຊິ່ງເປັນການເລືອກຕັ້ງສະມາຊິກສະພາຜູ້ແທນລາຊະດອນຊຸດໃໝ່ທັງ 222 ບ່ອນນັ່ງ ປາກົດວ່າແນວຮ່ວມບີເອັນພາຍໃຕ້ການນຳຂອງພັກອຳໂນໄດ້ຮັບການເລືອກຕັ້ງເຂົ້າມາພຽງ 79 ບ່ອນນັ່ງ ຄິດເປັນອັດຕາສ່ວນ 32% ຫລື ຄະແນນດິບ 3,79 ລ້ານຄະແນນ ຖືເປັນຜົນງານບໍ່ດີທີ່ສຸດໃນປະຫວັດສາດຂອງແນວຮ່ວມບີເອັນ ແລະ ເປັນເທື່ອທຳອິດນັບແຕ່ມາເລເຊຍໄດ້ຮັບເອກະລາດຈາກສະຫະລາຊະອານາຈັກ ໃນປີ 1957 ທີ່ພັກອຳໂນຕ້ອງພົ້ນຈາກການເປັນລັດຖະບານ.
ນອກຈາກສ້າງປະຫວັດສາດໂຄ່ນລົ້ມພັກອຳໂນໄດ້ສຳເລັດ, ທ່ານ ດຣ. ມະຫາເທ ເຊິ່ງຈະມີອາຍຸຄົບ 93 ປີ ໃນເດືອນກໍລະກົດນີ້ ກຽມສ້າງປະຫວັດສາດເປັນຜູ້ນຳລັດຖະບານອາຍຸຫລາຍທີ່ສຸດໃນໂລກ, ເຖິງວ່າສະມາຊິກປາກາຕັນ ຮາຣາປັນ ເຫັນພ້ອມໃຫ້ທ່ານ ດຣ. ມະຫາເທ ກັບມາເປັນນາຍົກລັດຖະມົນຕີອີກເທື່ອໜຶ່ງ ຫລັງສ້າງສະຖິຕິຄອງອຳນາດຍາວນານທີ່ສຸດໃນປະຫວັດສາດມາເລເຊຍ 23 ປີ, ແຕ່ທ່ານເຄີຍກ່າວວ່າ: ຖ້າຊະນະການເລືອກຕັ້ງ ລັດຖະບານຂອງທ່ານຈະຊຸກຍູ້ການຂໍອະໄພຍະໂທດໃຫ້ທ່ານ ອັນວາ ອິບຣາຮິມ ແກນນຳຝ່າຍຄ້ານຄົນສຳຄັນ ເຊິ່ງຮັບໂທດຈຳຄຸກມາແຕ່ປີ 2015 ແລະ ເມື່ອທ່ານ ອັນວາ ໄດ້ຮັບອິດສະຫລະພາບ, ທ່ານຈະຫລີກທາງໃຫ້ທ່ານ ອັນວາ ໄດ້ເປັນນາຍົກລັດຖະມົນຕີ.
