ການຊື້ສິນຄ້າຕິດຕົວຂອງຜູ້ເດີນທາງເຂົ້າລາວຜ່ານດ່ານສາກົນຂົວມິດຕະພາບ 1 ຫລຸດລົງ
ກົມພາສີກະຊວງການເງິນ ໃຫ້ຮູ້ວ່າ: ມາຮອດປັດຈຸບັນເຫັນວ່າປະລິມານພາຫະນະ ແລະ ການຊື້ສິນຄ້າເຄື່ອງຂອງຕິດຕົວເພື່ອຊົມໃຊ້ຂອງຜູ້ທີ່ເດີນເຂົ້າ ສປປ ລາວທີ່ບໍ່ມີລັກສະນະປະຈໍາຜ່ານດ່ານສາກົນຂົວມິດຕະພາບ 1 ແມ່ນມີຈໍານວນຫລຸດລົງຫລາຍ, ພາຍຫລັງໄດ້ມີການຈັດຕັ້ງປະຕິບັດເກັບອາກອນມູນຄ່າເພີ່ມໃນອັດຕາ 10% ຂອງມູນຄ່າສີນຄ້ານໍາເຂົ້າໃນລັກສະນະດັ່ງກ່າວທີ່ບໍ່ເກີນ 50 ໂດລາສະຫະລັດ ຫລ ປະມານ 4 ແສນກີບ.
ເຈົ້າໜ້າທີ່ພາສີປະຈໍາດ່ານສາກົນດັ່ງກ່າວ ໃຫ້ຮູ້ວ່າ: ການຈັດຕັ້ງປະຕິບັດເກັບອາກອນມູນຄ່າເພີ່ມ 10% ຢູ່ດ່ານສາກົນແຫ່ງນີ້ນັບແຕ່ເດືອນພະຈິກ 2016 ມາຮອດປັດຈຸບັນເຫັນວ່າຈໍານວນພາຫະນະເຂົ້າ-ອອກແມ່ນຫລຸດລົງ, ໂດຍສະເພາະແມ່ນການໄປຈັບຈ່າຍຊື້ສີນຄ້າເຄື່ອງຂອງຕິດຕົວຂອງຜູ້ເດີນທາງເຂົ້າມາແມ່ນຫລຸດລົງຫລາຍເຖິງ 70-80% ທຽບໃສ່ກ່ອນການປະຕິບັດມາດຕະການດັ່ງກ່າວ ແລະ ປັດຈຸບັນຜູ້ທີ່ເດີນທາງອອກນອກປະເທດສ່ວນຫລາຍແມ່ນໄປທ່ອງທ່ຽວ ແລະ ໄປປິ່ນປົວສຸຂະພາບ, ເຊິ່ງແຕກຕ່າງຈາກເມື່ອກ່ອນຜູ້ເດີນທາງອອກນອກປະເທດ ເມື່ອກັບເຂົ້າມາປະເທດແມ່ນໄດ້ຊື້ສີນຄ້າເຄື່ອງຂອງຕິດຕົວເປັນຈໍານວນຫລາຍ. ສ່ວນການເກັບລາຍຮັບອາກອນມູນຄ່າເພີ່ມນັບແຕ່ມື້ເລີ່ມຕົ້ນປະຕິບັດມາຮອດວັນທີ 31 ມັງກອນ 2017 ໄດ້ 115,5 ລ້ານກີບ, ສະເລ່ຍປະມານ 2-3 ລ້ານກີບຕໍ່ມື້.
ເຈົ້າໜ້າທີ່ພາສີດ່ານດັ່ງກ່າວ ໃຫ້ຮູ້ວ່າ: ການຈັດຕັ້ງປະຕິບັດການເກັບອາກອນມູນຄ່າເພີ່ມແມ່ນມີຜົນດີຫລາຍດ້ານ ເປັນຕົ້ນ: ເຮັດໃຫ້ການຊື້ສີນຄ້າຈາກຕ່າງປະເທດເຂົ້າມາປະເທດຫລຸດລົງ, ຫລຸດຜ່ອນເມັດເງິນໄຫລອອກນອກປະເທດ ແລະ ສົ່ງຜົນດີໃຫ້ຜູ້ປະກອບການພາຍໃນທີ່ດໍາເນີນທຸລະກິດເສຍພາສີອາກອນຖືກຕ້ອງຕາມລະບຽບກົດໝາຍໄດ້ຮັບຜົນປະໂຫຍດຫລາຍຂຶ້ນ. ທັງເຮັດໃຫ້ປະຊາຊົນມີສະຕິໃນການຈັດຕັ້ງປະຕິບັດລະບຽບກົດໝາຍ, ມີຄວາມຕື່ນຕົວປະກອບສ່ວນເສຍພັນທະໃຫ້ລັດຖະບານອີກດ້ວຍ.
