ນັກວິທະຍາສາດສອນຄອມພິວເຕີໃຫ້ຮຽນຮູ້ຄືກັບຄົນ

ຄອມພິວເຕີ ກຳລັງຈະມີຄວາມຄິດຄ້າຍຄືກັບມະນຸດຂື້ນທຸກມື້ແລ້ວ  ໂດຍສະເພາະໃນກຸ່ມຂອງສະໝອງກົນ ແລະ ເຄື່ອງຈັກ ທີ່ມີຄວາມສະຫລາດ. ໃນຂະນະນີ້ ນັກວິທະຍາສາດສະຫະລັດອາເມລິກາ ໄດ້ສ້າງຕົ້ນແບບທາງຄອມພິວເຕີ ຫລື ອັນກໍຣິຊຶມ ທີ່ຈັບ ຄວາມສາມາດທີ່ຈຳເພາະຂອງມະນຸດເພື່ອເຮັດຄວາມເຂົ້າໃຈຄວາມຄິດໃໝ່ໆໃນການສຶກສາ ເຊິ່ງກ່ຽວຂ້ອງກັບການຮຽນຮູ້ໂຕອັກສອນທີ່ຂຽນຂຶ້ນດ້ວຍມື ເຊິ່ງບໍ່ມີຄວາມລຶ້ງເຄີຍ.

ລະບົບອັນກໍຣິຊຶມ ຊ່ວຍໃຫ້ຄອມພິວເຕີສາມາດຈື່ຈຳ ແລະ ແຕ້ມສັນຍະລັກງ່າຍໆທີ່ບໍ່ສາມາດເຮັດການໄຈ້ແຍກໄດ້ຈາກມະນຸດ. “ວຽກງານວິໄຈນີ້ ລວມທັງວຽກງານວິໄຈອື່ນທີ່ມີລັກສະນະຄ້າຍຄືກັນ ຈະຊ່ວຍໃຫ້ນັກວິທະຍາສາດເຂົ້າໃຈລະບົບການຮຽນຮູ້ຂອງມະນຸດໄດ້ດີຍິ່ງຂຶ້ນ ແລະ ສາມາດຈະພັດທະນາລະບົບອັນກໍຣິຊຶມສຳລັບການຮຽນຮູ້ທ່ີຄ້າຍຄືກັບມະນຸດໄດ້ດີຂຶ້ນຕື່ມ ” ຜູ້ນຳການສຶກສາກ່າວ ເຊິ່ງກໍແມ່ນ ດຣ. Bernden Lake ລາວເປັນນັກວິທະຍາສາດທາງດ້ານການຮັບຮູ້ ແລະ ຂໍ້ມູນຈາກ New York  University.

ລະບົບອັນກໍຣິຊຶມ ຖືກອອກແບບເພື່ອໃຫ້ຄອມພິວເຕີສາມາດທີ່ຈະຮຽນຮູ້ໄດ້ຢ່າງວ່ອງໄວຈາກໂຕຢ່າງດຽວໃນທິດທາງດຽວກັບທີ່ມະນຸດເຮັດ. ລະບົບມາດຕະຖານຂອງອັນກໍຣິຊຶມໃນເຄື່ອງຈັກ ສຳລັບການຮຽນຮູ້ນັ້ນຕ້ອງການໂຕຢ່າງໃນການຝຶກອົບຮົມເປັນ 10 ເປັນ 100 ຫລື ແມ່ນແຕ່ເປັນ 1.000 ໂຕຢ່າງ ເພື່ອໃຫ້ໄດ້ຜົນທີ່ຄືກັນ.

ການແຕ້ມໂຕອັກສອນຈາກທົ່ວໂລກໃນການສຶກສາຄອມພິວເຕີທີ່ມີລະບົບອັນກໍຣິຊຶມແບບໃໝ່ ແລະ ໂຕຢ່າງຈາກຄົນຖືກເອົາມາສະເໜີຂຶ້ນພ້ອມກັບໂຕອັກສອນທີ່ເລືອກຂຶ້ນມາຈາກກຸ່ມຂໍ້ມູນກ່ວາ  1.600 ໂຕອັກສອນທີ່ໃຊ້ມືໃນການຂຽນຈາກ 50 ພາສາທົ່ວໂລກ ທັງນີ້ພວກເຂົາໄດ້ລວບລວມໂຕອັກສອນຂອງເອລ່ຽນໃນໜັງສືຈາກໂທລະພາບເຂົ້າໄປນຳ.

ໂຕຢ່າງຈາກຄົນ ແລະ ຄອມພິວເຕີຖືກທົດລອງໃຫ້ຂຽນໂຕອັກສອນທີ່ຫລາກຫລາຍອອກມາອີກເທື່ອໜຶ່ງ ຫລັງຈາກໄດ້ເຫັນໂຕຢ່າງໂຕອັກສອນ ຫລັງຈາກນັ້ນ ກຳມະການຈະຖືກຖາມໃຫ້ລະບຸວ່າ ໂຕອັກສອນໂຕໃດທີ່ຖືກຂຽນຂື້ນໂດຍຄອມພິວເຕີ ເຊິ່ງກຳມະການຄົ້ນພົບວ່າ ວຽກທີ່ຖືກເຮັດຂຶ້ນໂດຍຄອມພິວເຕີນັ້ນບໍ່ສາມາດທີ່ຈະໄຈ້ແຍກໄດ້ຈາກວຽກທີ່ເກີດຈາກໂຕຢ່າງທີ່ມາຈາກຄົນເລີຍ.