ຫລວງພະບາງ ຫວັງເກັບຄະແນນຈາກ ປກສ
ສະໂມສອນ ຫລວງພະບາງ ຢູໄນເຕັດ ຫວັງເກັບຄະແນນຈາກ ສະໂມສອນ ປກສ ເອັຟຊີ ໃນວັນທີ 17 ພຶດສະພາ ເວລາ 16:00 ໂມງ ທີ່ສະໜາມກິລານະຄອນຫລວງພະບາງ ຂອງການແຂ່ງຂັນເປບຊີ ລາວພຣີເມຍລີກ 2018.
ຕາມການໃຫ້ສໍາພາດ ທ່ານ ວາລະສິນ ດາລາພອນ ຄູຝຶກສະໂມສອນ ຫລວງພະບາງ ຢູໄນເຕັດ ວ່າ: ການລົງສະໜາມຄັ້ງນີ້ຖືວ່າເປັນຄັ້ງທີ 3 ທີ່ພວກເຮົາໄດ້ເປັນເຈົ້າບ້ານ ເຊິ່ງພວກເຮົາມີຄວາມໄດ້ປຽບຫລາຍສົມຄວນ ເພາະນັກກິລາຂອງພວກເຮົາແມ່ນມີຄວາມລຶ້ງເຄີຍ ແລະ ໄດ້ປຽບທາງດ້ານສະໜາມ. ຢ່າງໃດກໍຕາມ ເຖິງວ່າສະໂມສອນ ປກສ ເອັຟຊີ ຈະເປັນສະໂມສອນທີ່ມີນັກເຕະດີຫລາຍຄົນກໍຕາມ ແຕ່ການລົງສະໜາມຄັ້ງນີ້ພວກເຮົາຈະເກັບເອົາ 3 ຄະແນນໃຫ້ໄດ້ ເພື່ອຮັກສາອັນດັບທີ 2 ໃຫ້ໄດ້ໃນອາທິດນີ້.
ສ່ວນຕາຕະລາງການແຂ່ງຂັນວັນທີ 9 ພຶດສະພາ ເວລາ 17:00 ໂມງ ສະໂມສອນ ກອງທັບ ເອັຟຊີ ພົບ ສະໂມສອນ ປກສ ເອັຟຊີ ທີ່ສະໜາມກິລາແຫ່ງຊາດຫລັກ 16, ວັນເສົາ 12 ພຶດສະພາ ເວລາ 15:30 ໂມງສະໂມສອນ ດີເຄ ເອັຟຊີ ພົບ ສະໂມສອນ ປກສ ເອັຟຊີ ທີ່ສະໜາມກິລາ ມຊ 16.
