ສປປ ເກົາຫລີ ຫ້າມບໍ່ໃຫ້ພົນລະເມືອງມາເລເຊຍຢູ່ປະເທດຕົນອອກຕົນອອກເມືອງ
ຂ່າວສານສູນກາງເກົາຫຼີ ລາຍງານໃນວັນທີ 7 ມີນານີ້ວ່າ: ກະຊວງການຕ່າງປະເທດໄດ້ ແຈ້ງໃຫ້ສະຖານທູດມາເລເຊຍ ປະຈຳປະເທດຕົນຊາບໃນວັນດັ່ງກ່າວວ່າ: ຈະຫ້າມບໍ່ໃຫ້ພົນລະ ເມືອງມາເລເຊຍທີ່ຢູ່ ສປປ ເກົາຫຼີ ອອກເມືອງຊົ່ວຄາວ.
ຂ່າວແຈ້ງວ່າ: ສປປ ເກົາຫຼີ ຈະຫ້າມບໍ່ໃຫ້ພົນລະເມືອງມາເລເຊຍທີ່ຢູ່ປະເທດຕົນອອກເມືອງ ຊົ່ວຄາວຈົນກວ່າເຫດການທີ່ເກີດຂຶ້ນຢູ່ມາເລເຊຍກ່ອນໜ້ານີ້ໄດ້ຮັບການແກ້ໄຂຢ່າງທ່ຽງທຳ ແລະ ນັກການທູດປອດໄພ, ພ້ອມທັງຮັບປະກັນຄວາມປອດໄພໃຫ້ແກ່ພົນລະເມືອງປະເທດຕົນທີ່ຢູ່ໃນປະເທດມາເລເຊຍຕື່ມອີກ.
ຂ່າວແຈ້ງຕື່ມວ່າ: ສປປ ເກົາຫຼີ ຫວັງວ່າ: ສະຖານທູດມາ ເລເຊຍປະຈຳປະເທດຕົນ ແລະ ກະຊວງການຕ່າງປະເທດມາເລ ເຊຍມີເຈຕະນາດີໃນການພັດທະນາການພົວພັນລະຫວ່າງສອງ ປະເທດເປັນກົກ ແລະ ແກ້ໄຂເຫດການເທື່ອນີ້ຢ່າງທ່ຽງທຳໂດຍໄວ. ສ່ວນນັກການທູດ ແລະ ພົນລະເມືອງມາເລເຊຍກໍຈະດຳລົງຊີວິດເປັນປົກກະຕິໃນເງື່ອນໄຂ ແລະ ສະພາບແວດລ້ອມ ເໝືອນດັ່ງໄລຍະຜ່ານມາ.
ນອກຈາກນີ້, ນາຍົກລັດຖະມົນຕີ ນາຈິບ ຣາຊັກ ຂອງມາເລເຊຍ ກໍປະກາດໃນວັນດຽວກັນ ວ່າ: ຊາວ ສປປ ເກົາຫລີ ທຸກຄົນຢູ່ມາເລເຊຍ ບໍ່ພຽງແຕ່ເຈົ້າໜ້າທີ່ສະຖານທູດເທົ່ານັ້ນ ຈະບໍ່ໄດ້ຮັບ ອະນຸຍາດໃຫ້ເດີນທາງອອກຈາກມາເລເຊຍ ພາຍຫລັງຮອງນາຍົກລັດຖະມົນຕີ ນູ ຈາລານ ໂມ ຮາເໝັດ ແຈ້ງຕໍ່ສື່ມວນຊົນໜ້າສະຖານທູດ ສປປ ເກົາຫລີ ວ່າ: ນາຍົກລັດຖະມົນຕີມີຄຳສັ່ງບໍ່ອະນຸຍາດໃຫ້ເຈົ້າໜ້າທີ່ສະຖານທູດ ສປປ ເກົາຫລີ ເດີນທາງອອກນອກປະເທດ.
ກະຊວງການຕ່າງປະເທດມາເລເຊຍ ເປີດເຜີຍວ່າ: ປັດຈຸບັນນີ້ມີພົນລະເຮືອນຢູ່ ສປປ ເກົາຫລີ 11 ຄົນ ປະກອບມີເຈົ້າໜ້າທີ່ສະຖານທູດ 3 ຄົນ, ສະມາຊິກຄອບ ຄົວ 6 ຄົນ ແລະ ຜູ້ເຮັດວຽກກັບ ໂຄງການອາຫານແຫ່ງສະຫະປະຊາຊາດ 2 ຄົນ. ຂະນະທີ່ນັກວິເຄາະຄາດວ່າ: ມີຊາວ ສປປ ເກົາຫລີ ອາໄສຢູ່ມາເລເຊຍປະມານ 1.000 ຄົນ.
