ອາຊຽນຮ່ວມຫາລືວຽກງານເຕັກໂນໂລຊີຊີວະພາບ
ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໃນນາມເປັນຈຸດປະສານງານດ້ານວຽກງານເຕັກໂນໂລຊີຊີວະພາບອາຊຽນ ຂອງ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມຄະນະອະນຸກຳມະການອາຊຽນດ້ານເຕັກໂນໂລຊີຊີວະພາບຄັ້ງທີ 50 ຂຶ້ນໃນອາທິດຜ່ານມານີ້, ທີ່ໂຮງແຮມ ດອນຈັນ ພາເລດ, ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ລັດສະໝີ ພັນທະວົງ, ຮັກສາການຫົວໜ້າ ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ ແລະ ທ່ານ Dr.lr.bambang Sunarko, ອໍານວຍການສູນວິໄຈ ເຕັກໂນໂລຊີ ຊີວະພາບ, ອິນໂດເນເຊຍ,
ກອງປະຊຸມຄັ້ງນີ້ ເພື່ອປຶກສາຫາລື, ແລກປ່ຽນຄໍາຄິດເຫັນ, ສະຫຼຸບ ແລະ ລາຍງານຄວາມຄືບໜ້າຂອງການຈັດຕັ້ງປະຕິບັດແຜນງານ ແລະ ກິດຈະກຳ ບຸລິມະສິດ ດ້ານເຕັກໂນໂລຊີ ຊີວະພາບ ທີ່ສະໜັບສະໜູນແຜນປະຕິບັດງານອາຊຽນ ດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ 2016-2025 (ASEAN PLAN OF ACTION ON SCIENCE, TECHNOLOGY AND INNOVATION, APASTI 2016-2025), ບັນດາໂຄງການທີ່ກ່ຽວຂ້ອງວຽກງານສົ່ງເສີມ ແລະ ພັດທະນາວຽກງານເຕັກໂນໂລຊີ ຊີວະພາບຂອງແຕ່ລະປະເທດ, ພິຈາລະນາຮ່າງບົດສະເໜີໂຄງການໃໝ່ ແລະ ສະເໜີການຮ່ວມມື ກັບຄູ່ເຈລະຈາ ເພື່ອນຳສະເໜີຂໍງົບປະມານຕໍ່ກອງປະຊຸມ ASEAN COST ໃນການຈັດຕັ້ງປະຕິບັດ.
ກອງປະຊຸມຄັ້ງນີ້, ຍັງເປັນໂອກາດດີໃຫ້ແກ່ລາວ ໄດ້ແລກປ່ຽນບົດຮຽນ, ປະສົບການ, ການມີສ່ວນຮ່ວມໃນການຈັດຕັ້ງປະຕິບັດໂຄງການ ແລະ ຍາດແຍ່ງການຊ່ວຍເຫຼືອ ຈາກບັນດາປະເທດສະມາຊິກອາຊຽນ. ພ້ອມນີ້, ລາວເຮົາ ຍັງໄດ້ສະເໜີໂຄງການຂໍເປັນເຈົ້າພາບຈັດກອງປະຊຸມການຄວບຄຸມສັດຕູພືດ ແລະ ພະຍາດພືດ ທາງຊີວະພາບ (BIOLOGICAL CONTROL FORUM) ເພື່ອແລກປ່ຽນບົດຮຽນ ແລະ ປະສົບປະການກັບບັນດາປະເທດສະມາຊິກ ອາຊຽນອີກດ້ວຍ.
