ຢູ 16 ລາວ ຜ່ານເຂົ້າຮອບຮອງຊະນະເລີດ ຫລັງຊະນະເຈົ້າພາບ 2-0
ນັກກິລາຍິງທີມຊາດລາວ ລຸ້ນອາຍຸບໍ່ເກີນ 16 ປີ ຫລື ຢູ 16 ລົງສະໜາມຄັ້ງທີ 3 ສາມາດເອົາ ຊະນະ ອິນໂດເນເຊຍ (ເຈົ້າພາບ) 2-0 ຂອງການແຂ່ງຂັນບານເຕະຍິງຊີງແຊ້ມອາຊຽນ ລຸ້ນອາຍຸ 16 ປີ ຫລື AFF U-16 GIRLS’ CHAMPIONSHIP 2018 ຢູ່ປະເທດອິນໂດເນເຊຍ ໃນລະຫວ່າງວັນທີ 1-13 ພຶດສະພາ 2018 ສົ່ງຜົນໃຫ້ທີມຊາດລາວຜ່ານເຂົ້າຮອບຮອງຊະນະເລີດ.
ທີມຊາດລາວ ຜ່ານເຂົ້າຮອບຮອງຊະນະເລີດໃນຖານະອັນດັບ 2 ກຸ່ມບີ ລໍຖ້າພົບກັບອັນດັບ 1 ກຸ່ມ ເອ ເຊິ່ງຮອບຮອງຊະນະເລີດຈະແຂ່ງຂັນໃນວັນທີ 11 ພຶດສະພາ 2018 ເວລາ 16:00 ໂມງ ທີ່ສະໜາມBumi Sriwijaya ປະເທດອິນໂດເນເຊຍ.
ສະຫລຸບຕາຕະລາງຄະແນນກຸ່ມບີ ທີມຊາດໄທ ລົງສະໜາມ 3 ຄັ້ງ ຊະນະ 3 ມີ 9 ຄະແນນ, ທີມຊາດລາວ ລົງສະໜາມ 3 ຄັ້ງ ຊະນະ 2 ເສຍ 1 ມີ 6 ຄະແນນ, ທີມຊາດອິນໂດເນເຊຍ ລົງສະໜາມ 3 ຄັ້ງ ຊະນະ 1 ເສຍ 2 ມີ 3 ຄະແນນ, ທີມກຳປູເຈຍ ລົງສະໜາມ 3 ຄັ້ງ ເສຍ 2 ມີ 0 ຄະແນນ.
ການແຂ່ງຂັນຄັ້ງນີ້ມີທີມເຂົ້າຮ່ວມທັງໝົດ 9 ປະເທດ ແບ່ງອອກເປັນ 2 ກຸ່ມຄື: ກຸ່ມເອ ປະກອບມີ: ຟີລິບປິນ, ມຽນມາ, ຫວຽດນາມ, ມາເລເຊຍ ແລະ ສິງກະໂປ, ສ່ວນກຸ່ມບີ ປະກອບມີ: ໄທ, ກຳປູເຈຍ, ລາວ ແລະ ອິນໂດເນເຊຍ (ເຈົ້າພາບ).
