ຫວຽດນາມ-ກຳປູເຈຍ ລົງນາມສ້າງທາງຫລວງເຊື່ອມຕໍ່ໂຮ່ຈີມິງ-ພະນົມເປັນ
ພະນົມເປັນ 25 ເມສາ: ຜູ້ນຳຫວຽດນາມ ແລະ ກຳປູເຈຍ ເປັນປະທານໃນພິທີລົງນາມສ້າງທາງຫລວງເຊື່ອມຕໍ່ນະຄອນໂຮ່ຈີມິງຂອງຫວຽດນາມກັບນະຄອນຫລວງພະນົມເປັນຂອງກຳປູເຈຍ.
ນາຍົກລັດຖະມົນຕີ ຫງວຽນ ຊວນ ຟຸກ ຂອງຫວຽດນາມ ນຳພາຄະນະພົບປະຫາລືກັບນາຍົກລັດຖະມົນຕີ ຮຸນ ເຊນ ຂອງກຳປູເຈຍ ເປັນມື້ທີສອງໃນວັນທີ 25 ເມສານີ້ ລະຫວ່າງການຢ້ຽມຢາມກຳປູເຈຍ 3 ວັນ ສະຫລອງການສະຖາປະນາການພົວພັນທາງການທູດຄົບຮອບ 50 ປີ. ຈາກນັ້ນໄດ້ເປັນປະທານໃນພິທີລົງນາມຂໍ້ຕົກລົງການຮ່ວມມືຫລາຍສະບັບ, ໜຶ່ງໃນນັ້ນຄືການສ້າງທາງຫລວງເຊື່ອມຕໍ່ນະຄອນໂຮ່ຈີມິງກັບນະຄອນຫລວງພະນົມເປັນ, ສ່ວນໃນວັນທີ 24 ເມສາ, ນາຍົກລັດຖະມົນຕີທັງສອງ ໄດ້ເປີດຂົວເຊື່ອມຕໍ່ແຂວງກັນດາວ ທາງໃຕ້ຂອງກຳປູເຈຍກັບແຂວງອັນກຽງ ບໍລິເວນສາມຫລ່ຽມແມ່ນ້ຳຂອງ ທາງຕາເວັນຕົກສຽງໃຕ້ຂອງຫວຽດນາມ ເພື່ອສົ່ງເສີມການຄ້າ ແລະ ການຮ່ວມມືລະຫວ່າງກັນ.
