ລາວເລີ່ມໂຄງການຄວບຄຸມຄວາມສ່ຽງຈາກໄພພິບັດ
ສປປ ລາວ, ພວມເລີ່ມຈັດຕັ້ງປະຕິບັດໂຄງການຄວບຄຸມຄວາມສ່ຽງຈາກໄພພິບັດທໍາມະຊາດ, ຫລັງຈາກໄດ້ຮັບການສະໜັບສະໜູນເງິນກູ້ດອກເບ້ຍຕໍ່າ ຈາກທະນາຄານໂລກຈໍານວນ 31 ລ້ານໂດລາສະຫະລັດ ພາຍໃຕ້ໂຄງການ ຄວບຄຸມຄວາມສ່ຽງຈາກໄພພິບັດທຳມະຊາດໃນຂົງເຂດອາຊີຕາເວັນອອກສ່ຽງໃຕ້ “Lao PDR Southest Asia Dis aster Risk Management Project” ແລະ ຈະປະຕິບັດໜ້າວຽກສໍາຄັນຄື: ໂຄງການກໍ່ສ້າງກັນເຈື່ອນເພື່ອປ້ອງກັນນ້ຳຖ້ວມຕາມລ່ອງແມ່ນໍ້າກໍຢູ່ເມືອງໄຊແຂວງອຸດົມໄຊ, ໂດຍກະຊວງໂຍທາທິການ ແລະ ຂົນສົ່ງ ເປັນຜູ້ຈັດຕັ້ງປະຕິບັດ, ໂຄງການປັບປຸງລະບົບເຕືອນໄພລ່ວງໜ້າ, ລະບົບອຸຕຸນິຍົມ ແລະ ກຽມພ້ອມຕໍ່ໄພພິບັດຕາມລ່ອງແມ່ນໍ້າອູຢູ່ 3 ແຂວງຄື: ແຂວງຫລວງພະບາງ, ອຸດົມໄຊ ແລະ ຜົ້ງສາລີ ໂດຍກະຊວງຊັບພະຍາກອນທຳມະຊາດ ແລະ ສິ່ງແວດລ້ອມເປັນຜູ້ຈັດຕັ້ງປະຕິບັດ. ໂຄງການສ້າງກົນໄກການເງິນລະບົບປະກັນໄພຄວາມສ່ຽງຂອງພາກພື້ນເພື່ອຊ່ວຍລັດຖະບານຮັບປະກັນແຫລ່ງທຶນທີ່ວ່ອງໄວ ເພື່ອສະໜອງທຶນໃຫ້ແກ່ການຕອບໂຕ້ສຸກເສີນ ແລະ ຟື້ນຟູໂດຍໄວ, ຫລັງຈາກເກີດໄພພິບັດ ໂດຍກະຊວງການເງິນເປັນຜູ້ຈັດຕັ້ງປະຕິບັດ. ໂຄງການເຊື່ອມສານວຽກງານຫລຸດຜ່ອນຄວາມສ່ຽງຈາກໄພພິບັດທຳມະຊາດເຂົ້າໃນແຜນພັດທະນາເສດຖະກິດ-ສັງຄົມ ແລະ ການລົງທຶນຂອງລັດ ແລະ ວຽກງານບໍລິຫານໂຄງການ, ໂດຍກະຊວງແຜນການ ແລະ ການລົງທຶນເປັນຜູ້ຈັດຕັ້ງປະຕິບັດ ແລະ ໂຄງການສ້້າງກົນໄກການຕອບໂຕ້ສຸກເສີນຕໍ່ເຫດການໄພພິບັດຕ່າງໆ, ໂດຍມີໄລຍະເວລາຈັດຕັ້ງປະຕິບັດວຽກງານທັງໝົດ 5 ປີໃຫ້ສໍາເລັດ. ແລະ ໃນທ້າຍອາທິດຜ່ານມານີ້, ກະຊວງແຜນການ ແລະ ການລົງທຶນ, ທະນາຄານໂລກ, ພ້ອມດ້ວຍພາກສ່ວນກ່ຽວຂ້ອງຈາກສູນກາງ ແລະ ທ້ອງຖິ່ນ ກໍໄດ້ຈັດກອງປະຊຸມປຶກສາຫາລືການປະຕິບັດບັນດາໂຄງການດັ່ງກ່າວ, ເພື່ອຮັບປະກັນໃຫ້ບັນດາຂະແໜງການ ແລະ ທ້ອງຖິ່ນ ກ່ຽວຂ້ອງ, ເອົາໃຈໃສ່ປະຕິບັດໃຫ້ຖືກຕ້ອງ, ມີຄວາມຮັບຜິດຊອບສູງ, ຮັບປະກັນໃຫ້ການນຳໃຊ້ທຶນມີປະສິດທິຜົນສູງ, ມີຄວາມໂປ່ງໃສ, ສ້າງປະໂຫຍດໃຫ້ປະຊາຊົນ ແລະ ໃຫ້ມີຄວາມຍືນຍົງ.
ທ່ານຮອງລັດຖະມົນຕີກະຊວງແຜນການ ແລະ ການລົງທຶນ ຄໍາລຽນ ພົນເສນາ ໃຫ້ຮູ້ວ່າ: ໄພພິບັດທຳມະຊາດໄດ້ຂົ່ມຂູ່ປະເທດເຮົາເປັນປະຈຳ ເປັນຕົ້ນ: ໃນໄລຍະເດືອນສິງຫາປີ 2017 ຜ່ານມາ, ປະເທດເຮົາໄດ້ຮັບຜົນກະທົບຈາກສະພາບອາກາດປ່ຽນແປງ ແລະ ໄພພິບັດທຳມະຊາດ ເຮັດໃຫ້ເກີດນ້ຳຖ້ວມ, ດິນເຈື່ອນຢູ່ຫລາຍແຂວງພາກເໜືອ, ໂດຍສະເພາະແຂວງອຸດົມໄຊບ້ານເຮືອນປະຊາຊົນລຽບຕາມແຄມນ້ຳມ້າວ ແລະ ນໍ້າກໍ ໄດ້ຮັບຜົນກະທົບເສຍຫາຍໜັກໜ່ວງ, ພື້ນຖານໂຄງລ່າງໃນເຂດຕົວເມືອງ ແລະ ລະບົບສາທາລະນຸປະໂພກໄດ້ຮັບຄວາມເສຍຫາຍ, ເສັ້ນທາງຫລາຍສາຍຖືກຕັດຂາດ, ລະບົບນ້ຳປະ ປາ ແລະ ຕາຂ່າຍໄຟຟ້າຖືກກະທົບເປ່ເພເສຍຫາຍ, ໂດຍສະເພາະ 4 ເມືອງຄື: ເມືອງໄຊ, ເມືອງຫລາ, ນາໝໍ້ ແລະ ເມືອງງາ, ມີ 43 ບ້ານ, 1.108 ຄອບຄົວ ແລະ ມີເຮືອນເປ່ເພ 40 ຫລັງ ແລະ ມີຜູ້ເສຍຊີວິດ 1 ຄົນ, ລວມມີມູນຄ່າຄວາມເສຍຫາຍກວ່າ 24 ຕື້ກີບ.
