ທະນາຄານກາງເຕືອນຢ່າຫລົງເຊື່ອລະດົມທຶນຜິດລະບຽບ
ເມື່ອບໍ່ດົນມານີ້, ທະນາຄານແຫ່ງ ສປປ ລາວ ໄດ້ອອກແຈ້ງການເຕືອນປະຊາຊົນບັນດາເຜົ່າໃຫ້ມີສະຕິລະວັງຕົວບໍ່ຫລົງເຊື່ອໂຄສະນາປຸກລະດົມທຶນຂອງບໍລິສັດ ຟາຍນານໂຊ ໂອກ (Financial.org), ພາຍຫລັງເຫັນວ່າບໍລິສັດດັ່ງກ່າວບໍ່ໄດ້ຮັບອະນຸຍາດເຄື່ອນໄຫວລະດົມທຶນທີ່ບໍ່ຖືກຕ້ອງຕາມລະບຽບກົດໝາຍ ສປປ ລາວ, ເຊິ່ງຈະສ້າງຄວາມເສຍຫາຍຕໍ່ຊັບສີນຂອງປະຊາຊົນ ແລະ ຕໍ່ລະບົບເສດຖະກິດປະເທດ.
ແຈ້ງການດັ່ງກ່າວໄດ້ລະບຸວ່າ: ປັດຈຸບັນ, ໄດ້ມີບໍລິສັດຈຳນວນໜຶ່ງເຄື່ອນໄຫວລະດົມມວນຊົນເຂົ້າຮ່ວມລົງທຶນທີ່ບໍ່ສອດຄ່ອງກັບໃບທະບຽນວິສາຫະກິດ ແລະ ເມື່ອບໍ່ດົນມານີ້, ກໍມີບໍລິສັດຟາຍນານໂຊ ໂອກ ເຄື່ອນໄຫວໂຄສະນາລະດົມທຶນຢູ່ ສປປ ລາວ ເພື່ອໄປລົງທຶນໃນຕະຫລາດຮຸ້ນຢູ່ຕ່າງປະເທດ, ເຊິ່ງອ້າງວ່າຈະໃຫ້ຜົນຕອບແທນສູງ (8% ຕໍ່ເດືອນ) ແຕ່ໃນຕົວຈິງບໍລິສັດດັ່ງກ່າວແມ່ນບໍ່ໄດ້ຮັບອະນຸຍາດເຄື່ອນໄຫວທຸລະກິດໃນຮູບແບບດັ່ງກ່າວຢ່າງຖືກຕ້ອງຕາມລະບຽບກົດໝາຍຂອງ ສປປ ລາວ. ສະນັ້ນ, ທະນາຄານແຫ່ງ ສປປ ລາວ ຈຶ່ງແຈ້ງມາຍັງພະນັກງານ, ທະຫານ, ຕໍາຫລວດ, ຊາວຄ້າຂາຍ ແລະ ປະຊາຊົນບັນດາເຜົ່າໃນທົ່ວປະເທດ ເພີ່ມທະວີຄວາມມີສະຕິລະວັງຕົວບໍ່ໃຫ້ຫລົງເຊື່ອຕໍ່ກົນອຸບາຍການໂຄສະນາຂອງບໍລິສັດດັ່ງກ່າວທີ່ຈະສ້າງຜົນເສຍຫາຍຕໍ່ຊັບສິນຂອງຕົນ, ສ້າງຄວາມບໍ່ເປັນລະບຽບຮຽບຮ້ອຍ, ຄວາມບໍ່ສະຫງົບຕໍ່ສັງຄົມ ແລະ ລະບົບການເງິນ-ເງິນຕາຂອງຊາດ, ພ້ອມທັງ, ຫລີກເວັ້ນໃຫ້ການຮ່ວມມືແກ່ບໍລິສັດຟາຍນານໂຊໂອກໃນການຈັດຝຶກອົບຮົມ, ສຳມະນາ ແລະ ໂຄສະນາຊວນເຊື່ອຕ່າງໆ ເພື່ອເປັນການລະດົມທຶນ ແລະ ໃນກໍລະນີຫາກພົບເຫັນ, ທະນາຄານແຫ່ງ ສປປ ລາວ ແລະ ພາກສ່ວນທີ່ກ່ຽວຂ້ອງຈະປະຕິບັດມາດຕະການເຂັ້ມງວດຕາມລະບຽບກົດໝາຍ ແລະ ຖ້າຫາກພາກສ່ວນໃດ ຫລື ບຸກຄົນໃດໄດ້ຮັບຄວາມເສຍຫາຍ ຫລື ໄດ້ຫລົງເຊື່ອການໂຄສະນາດັ່ງກ່າວໄປຮ່ວມທຶນແລ້ວນັ້ນແມ່ນສາມາດແຈ້ງຂໍ້ມູນຫາກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ ໝາຍເລກໂທສະລັບ 021- 265715, ກົມຕຳຫລວດເສດຖະກິດກະຊວງປ້ອງກັນຄວາມສະຫງົບໝາຍເລກໂທລະສັບ 020-99393394, 020-97892653, 020-97891453 ແລະ 020-98089554.
