ລາວກຽມສະຫລອງໃຫຍ່ວັນຄົບຮອບ 50 ປີການກຳເນີດເມືອງວຽງໄຊ
ລັດຖະບານກະກຽມສະເຫລີມສະຫລອງເມືອງວຽງໄຊ ຄົບຮອບ 50 ປີ (30/11/1968 – 30/11/2018) ໃນວັນທີ 30 ພະຈິກ 2018 ໂດຍຈະຈັດຫລາຍກິດຈະກຳສຳຄັນ ແລະ ມີຄວາມໝາຍທາງປະຫວັດສາດ. ຂະນະນີ້ກຳລັງກະກຽມຄວາມພ້ອມດ້ານຂະບວນການຕ່າງໆໃຫ້ພົ້ນເດັ່ນ.
ທ່ານ ພູໂຊຈ ທຳມະວິໄຊ ຮອງເຈົ້າແຂວງຫົວພັນ ໃຫ້ສຳພາດວ່າ: ປັດຈຸບັນ ແຂວງຫົວພັນກຳລັງຮ່ວມກັບສູນກາງກະກຽມສະເຫລີມສະຫລອງເມືອງວຽງໄຊ ຄົບຮອບ 50 ປີ ໃນນີ້ສະເພາະໜ້າວຽກທີ່ແຂວງຫົວພັນຮັບຜິດຊອບຕົ້ນຕໍແມ່ນການກໍ່ສ້າງພື້ນຖານໂຄງລ່າງ ກໍຄືການບູລະນະ ແລະ ພັດທະນາຕົວເມືອງວຽງໄຊ ລວມມີ 9 ໂຄງການຄື: ການກໍ່ສ້າງສະໜາມຫລວງ, ສວນສາທາລະນະ, ຫໍວັດທະນະທຳ, ສ້ອມແປງ-ປູຢາງເສັ້ນທາງໃນເທສະບານເມືອງ, ການພັດທະນາໜອງນ້ຳ, ສ້າງວົງວຽນ 5 ແຍກ-ໂຮງຮຽນການເມືອງການປົກຄອງ-ບ້ານບັກ ແລະ ໂຄງການສ້ອມແປງສະໂມສອນ ລວມມູນຄ່າທັງໝົດ 24 ຕື້ກີບ. ໃນນີ້ມີບາງໂຄງການໄດ້ຮັບການຈັດຕັ້ງປະຕິບັດສຳເລັດແລ້ວຫລາຍກວ່າ 40% ແລະ ມີບາງໂຄງການພວມຢູ່ໃນຂັ້ນຕອນປະກອບເອກະສານສັນຍາ. ຄາດວ່າທຸກໂຄງການຈະໃຫ້ສຳເລັດພາຍໃນເດືອນກັນຍາປີນີ້. ນອກນີ້ ແມ່ນການກະກຽມວາລະ ແລະ ບົດຄຳເຫັນຂອງການນຳແຂວງໃນພິທີສະເຫລີມສະຫລອງ ລວມທັງຈຳນວນພົນ ເພື່ອເຂົ້າຮ່ວມກ້ອນກຳລັງສວນສະໜາມ ແລະ ອື່ນໆ. ສ່ວນວຽກທີ່ຮ່ວມກະກຽມກັບສູນກາງ ລວມມີວຽກງານປ້ອງກັນຄວາມສະຫງົບ, ຂຽນປຶ້ມມູນເຊື້ອເມືອງວຽງໄຊ, ສ້າງຟີມເອກະສານ, ກະກຽມປະດັບປະດາ-ຕົບແຕ່ງ, ຝຶກແອບກ້ອນກຳລັງ, ແຕ່ງເພງ, ການສະແດງສິລະປະ-ວັນນະຄະດີ ແລະ ອື່ນໆ.
ຮອງເຈົ້າແຂວງຫົວພັນ ໃຫ້ຮູ້ອີກວ່າ: ສຳລັບກິດຈະກຳຕ່າງໆທີ່ຈະຈັດຂຶ້ນໃນໂອກາດສະເຫລີມສະຫລອງວັນປະຫວັດສາດສຳຄັນນີ້ ນອກຈາກມີພິທີຢ່າງຍິ່ງໃຫຍ່ຂຶ້ນພ້ອມກັນຢູ່ສອງສະຖານທີ່ ຄືຢູ່ເມືອງວຽງໄຊ ແລະ ນະຄອນຫລວງວຽງຈັນແລ້ວ ຍັງຈະມີຫລາຍກິດຈະກຳສຳຄັນເຊັ່ນ: ຈັດປາຖະກະຖາກ່ຽວກັບເມືອງວຽງໄຊຢູ່ບັນດາກະຊວງ, ສຳນັກງານ-ອົງການ ທັງຢູ່ສູນກາງ ແລະ ທ້ອງຖິ່ນ, ຈັດຂະບວນຄາລາວານຫວນຄືນສູ່ເມືອງວຽງໄຊຖານທີ່ໝັ້ນຂອງການປະຕິວັດ, ການປະກວດບົດຂັບ-ບົດລຳທີ່ສະແດງເຖິງມູນເຊື້ອຂອງເມືອງວຽງໄຊ, ການໂຄສະນາປະຊາສຳພັນໃຫ້ສັງຄົມຮັບຮູ້ກ່ຽວກັບເມືອງວຽງໄຊ ແລະ ອື່ນໆ.
ເມືອງວຽງໄຊ ເປັນສະຖານທີ່ທີ່ມີຄວາມໝາຍ, ຄວາມສຳຄັນຍິ່ງ ເປັນຖິ່ນກຳເນີດຂອງສູນບັນຊາສູ້ຮົບ ແລະ ຖານທີ່ໝັ້ນຂອງການປະຕິວັດ ແລະ ເປັນຈຸດກຳເນີດຂອງ ສປປ ລາວ. ປັດຈຸບັນ ລັດຖະບານກຳລັງສ້າງແຜນແມ່ບົດ ເພື່ອພັດທະນາໃຫ້ເປັນເມືອງທ່ອງທ່ຽວທາງດ້ານປະຫວັດສາດ ແລະ ທຳມະຊາດ ດ້ວຍການສຸມໃສ່ກໍ່ສ້າງພື້ນຖານໂຄງລ່າງທີ່ຈຳເປັນ, ພ້ອມພັດທະນາເມືອງວຽງໄຊຕາມ 5 ວິໄສທັດຄື: ສ້າງໃຫ້ເປັນເມືອງມໍລະດົກປະຫວັດສາດແຫ່ງຊາດ, ເປັນເມືອງທີ່ອຸດົມຮັ່ງມີ, ເປັນເມືອງສຸຂະອະນາໄມທີ່ດີ, ເປັນເມືອງຍ່າງທ່ຽວຊົມ ທັງມີຄວາມສະຫງົບ ແລະ ເປັນເມືອງສີຂຽວ.
