ຍົກນໍ້າໜັກລາວ ຍາດໄດ້ຫລຽນເງິນ ທີ່ປະເທດໄທ
ໃນການແຂ່ງຂັນກິລາຍົກນໍ້າໜັກເຍົາວະຊົນຊີງແຊ້ມນາໆຊາດ ຫລື ລາຍການ 1st EGAT King’s Cup & 12th EGAT Princess’ cup ທີ່ປະເທດໄທ ຈັດຂຶ້ນຕົ້ນເດືອນພຶດສະພານີ້ ເຊິ່ງມີນັກກິລາ 200 ກວ່າຄົນເຂົ້າຮ່ວມ. ຂະນະທີ່ ນັກກິລາທີມຊາດລາວລົງສະໜາມສາມາດຍາດໄດ້ຫລຽນເງິນໃນລຸ້ນນໍ້າໜັກ 50 ກິໂລ.
ທ່ານ ນາງ ເຄືອຄຳ ລີເຍ່ຍວື ຄູເຝິກນັກກິລາເຍົາວະຊົນທີມຊາດລາວ ໃຫ້ສໍາພາດວ່າ: ເພື່ອເປັນການແລກປ່ຽນປະສົບການ ແລະ ບົດຮຽນກັບປະເທດອື່ນໆ ພ້ອມທັງກຽມຄວາມພ້ອມນັກກິລາຍົກນໍ້າໜັກທີມຊາດລາວເຂົ້າຮ່ວມແຂ່ງຂັນລະດັບພາກພື້ນ ແລະ ສາກົນໃນຕໍ່ໜ້າ. ດັ່ງນັ້ນ, ສະຫະພັນຍົກນໍ້າໜັກແຫ່ງຊາດລາວ ໄດ້ສົ່ງນັກກິລາຍົກນໍ້າໜັກເຍົາວະຊົນທີມຊາດເຂົ້າຮ່ວມການແຂ່ງຂັນກິລາຍົກນໍ້າໜັກຊີງແຊ້ມນາໆຊາດ ຫລື ລາຍການ 1st EGAT King’s Cup & 12th EGAT Princess’ cup ທີ່ເທດໄທ ຈັດຂຶ້ນລະຫວ່າງວັນທີ 1-10 ພຶດສະພາ 2018 ເຊິ່ງມີນັກກິລາຈາກ 7 ປະເທດເຂົ້າຮ່ວມ ປະກອບມີ: ມາເລເຊຍ, ລາວ, ມົງໂກເຣຍ, ມຽນມາ, ກຳປູເຈຍ, ອິນໂດເນເຊຍ, ເຈົ້າພາບໄທ ແລະ ນັກກິລາຈາກສະໂມສອນທົ່ວຣາຊະອານາຈັກໄທເຂົ້າຮ່ວມ 200 ກວ່າຄົນ, ໃນນັ້ນ ມີການແຂ່ງຂັນທັງລຸ້ນເຍົາວະຊົນ ແລະ ລຸ້ນທົ່ວໄປ. ສະເພາະ ສປປ ລາວ ໄດ້ສົ່ງຄູເຝິກ 2 ຄົນ ແລະ ນັກກິລາ 7 ຄົນ, ຍິງ 4 ຄົນ ຮ່ວມແຂ່ງຂັນລາຍການດັ່ງກ່າວ.
ຜ່ານການແຂ່ງຂັນ ນັກກິລາຍົກນໍ້າໜັກລາວ ໄດ້ລົງສະໜາມແຂ່ງຂັນມື້ທຳອິດໃນວັນທີ 1 ພຶດສະພາ ພຽງຄົນດຽວຈາກ ທ້າວ ຕອນຊຽນ ແຊ່ຈ້າວ ລຸ້ນນໍ້າໜັກ 50 ກິໂລ ລາຍການນີ້ມີນັກກິລາເຂົ້າຮ່ວມຊີງໄຊ 38 ຄົນ ແບ່ງອອກເປັນ 3 ກຸ່ມ, ໃນນັ້ນ ສຳລັບກຸ່ມບີ ແລະ ກຸ່ມຊີ ແມ່ນຈັດໃຫ້ນັກກິລາມືໃໝ່ ແລະ ນັກກິລາລາວຖືກຈັດຢູ່ກຸ່ມເອ ຜົນປາກົດວ່າ: ທ້າວ ຕອນຊຽນ ແຊ່ຈ້າວ ຍົກທ່າສະເນັດ ໄດ້ 83 ກິໂລ ສາມາດຍາດໄດ້ຫລຽນເງິນຫລຽນທຳອິດໃຫ້ແກ່ນັກກິລາລາວ. ຂະນະທີ່ ຫລຽນຄຳຕົກເປັນຂອງນັກກິລາໄທ ແລະ ຫລຽນທອງຮ່ວມແມ່ນເປັນຂອງນັກກິລາມາເລເຊຍ ແລະ ໄທ ສົ່ງຜົນໃຫ້ນັກກິລາລາວຍັງເຫຼືອຄິວລ່າຫຼຽນອີກ 6 ລາຍການ.
