ລາວຖືກຈັດຢູ່ກຸ່ມເອຮ່ວມກັບ ຫວຽດນາມ ບານເຕະຊາຍຊີງແຊ້ມອາຊຽນ 2018
ໃນວັນທີ 2 ພຶດສະພານີ້ ທີ່ປະເທດອິນໂດເນເຊຍ ໄດ້ມີພິທີຈັບສະຫລາກການແຂ່ງຂັນບານເຕະຊາຍຊີງແຊ້ມອາຊຽນ ຄັ້ງທີ 12 ຫລື AFF Suzuki Cup 2018 ເຊິ່ງມີການປ່ຽນຮູບແບບການແຂ່ງຂັນຈາກເອົາ 8 ທີມໃນຮອບສຸດທ້າຍ ມາເປັນ 10 ທີມໃນຮອບສຸດທ້າຍ ໂດຍໃຫ້ສິດທີມທີ່ມີອັນດັບໂລກ ແລະ ອັນດັບຕົ້ນໆໃນອາຊຽນມາເປັນຕົວວັດ ຄັດເຂົ້າຮອບແບ່ງກຸ່ມແບບອັດຕະໂນມັດ ປາກົດວ່າ: ທີມຊາດລາວ ອັນດັບ 9 ຂອງອາຊຽນ ໄດ້ສິດເຂົ້າເຖິງຮອບແບ່ງກຸ່ມ ໂດຍບໍ່ຕ້ອງຄັດເລືອກຖືກຈັບສະຫລາກມາຢູ່ກຸ່ມເອ ຮ່ວມກັບ ທີມຊາດຫວຽດນາມ ອະດີດແຊ້ມ ປີ 2008, ມາເລເຊຍ ອະດີດແຊ້ມ ປີ 2010, ມຽນມາ ແລະ ກຳປູເຈຍ.
ຂະນະທີ່ ກຸ່ມບີ ປະກອບມີ: ໄທ ແຊ້ມເກົ່າ ທັງເປັນແຊ້ມສູງສຸດ 5 ສະໄໝ, ສິງກະໂປ ແຊ້ມ 4 ສະໄໝ, ອິນໂດເນເຊຍ, ຟິລິບປິນ ແລະ ບຣູໄນ ຫລື ຕີມໍຣເລັສເຕ 2 ທີມທີ່ມີອັນດັບໃນອາຊຽນຕໍ່າສຸດ ທີ 10 ແລະ ທີ 11 ຕ້ອງໄດ້ເພລອັອຟ 2 ນັດ ແບບໄປກັບ ໃຜຊະນະຈະໄດ້ສິດຮ່ວມຮອບແບ່ງກຸ່ມ ນັດທີ 1 ຈະຫລິ້ນທີ່ບ້ານຂອງຕີມໍຣເລັສເຕ ໃນວັນທີ 3 ກັນຍາ 2018 ນັດທີ 2 ກັບໄປຫລິ້ນທີ່ ບຣູໄນ ໃນວັນທີ 8 ກັນຍາ 2018.
