ຄະແນນນິຍົມຜູ້ນຳສອງເກົາຫລີ ເພີ່ມຂຶ້ນຫລັງປະຊຸມຄັ້ງສຳຄັນ
ສຳນັກຂ່າວຕ່າງປະເທດລາຍງານວ່າ: ຜົນສຳຫລວດຄວາມຄິດເຫັນຊາວ ສ.ເກົາຫລີ ທີ່ມີຕໍ່ປະທານາທິບໍດີ ມຸນ ແຈອິນ ໂດຍສຳນັກວິໄຈ “ຣຽວມິເຕີ” ພົບວ່າຄະແນນນິຍົມຂອງຜູ້ນຳ ສ.ເກົາຫລີ ອາຍຸ 65 ປີ ຫລັງຜ່ານພົ້ນກອງປະຊຸມສຸດຍອດຜູ້ນຳຮ່ວມກັບທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ໃນວັນທີ 27 ເມສາຜ່ານມາ ຢູ່ທີ່ 78,6% ເພີ່ມຂຶ້ນຫລາຍກວ່າ 8 ຈຸດຈາກໄລຍະເວລາກ່ອນກອງປະຊຸມ ຖືເປັນຄະແນນນິຍົມໃນລະດັບສູງທີ່ສຸດເປັນປະຫວັດສາດສຳລັບທ່ານ ມຸນ ແຈອິນ ນັບແຕ່ຮັບຕຳແໜ່ງໃນເດືອນພຶດສະພາປີຜ່ານມາ.
Nearly 80 percent of South Koreans say they trust Kim Jong Un, according to a new poll https://t.co/UwFlE13f3v
— TIME (@TIME) May 2, 2018
ຂະນະທີ່ຜົນສຳຫລວດຄວາມຄິດເຫັນຊາວ ສ.ເກົາຫລີ ໃນໄລຍະຜ່ານພົ້ນກອງປະຊຸມສຸດຍອດຜູ້ນຳສອງເກົາຫລີ ຈັດໂດຍສະຖານີໂທລະພາບ MBC ເຊິ່ງເປັນໜຶ່ງໃນສະຖານີໂທລະພາບຊັ້ນນຳຂອງປະເທດ ປາກົດວ່າ: 78% ຂອງກຸ່ມຕົວຢ່າງມີມຸມມອງຕໍ່ທ່ານ ກິມ ຈ໋ອງອຸນ ເປັນບຸກຄົນທີ່ “ເຊື່ອຖືໄດ້” ແລະ ຫາກວິເຄາະລະອຽດຍິ່ງຂຶ້ນຈາກອັດຕາສ່ວນດັ່ງກ່າວພົບວ່າປະມານ 60% ເບິ່ງຜູ້ນຳຂອງ ສປປ ເກົາຫລີ “ໄວ້ວາງໃຈໄດ້ໃນພາບລວມ” ສ່ວນອີກປະມານ 17% ເບິ່ງວ່າທ່ານ ກິມ ຈ໋ອງອຸນ “ໜ້າເຊື່ອຖື”.
