ອໍສະໂລຈະເປັນເມືອງທຳອິດຂອງໂລກທີ່ມີຍານພາຫະນະປອດມົນລະພິດ
ອໍສະໂລ 25 ເມສາ: ນະຄອນຫລວງອໍສະໂລຂອງນອກແວຈະເປັນເມືອງທຳອິດຂອງໂລກທີ່ມີຍານພາຫະນະປອດມົນລະພິດ ເພາະລົດໂດຍສານສາທາລະນະສ່ວນຫລາຍໃຊ້ພະລັງງານນ້ຳ ຫລື ໄຟຟ້າ ແລະ ມີອັດຕາສ່ວນລົດໄຟຟ້າຫລາຍທີ່ສຸດໃນໂລກ.
ສູນເພື່ອການວິໄຈເສດຖະສາດ ແລະ ທຸລະກິດຕັ້ງຢູ່ນະຄອນຫລວງລອນດອນຂອງອັງກິດ ຈະຈັດການສຳມະນາທາງເວັບໄຊໃນວັນທີ 27 ເມສານີ້ ເຜີຍແຜ່ລາຍງານການຈັດອັນດັບ 35 ເມືອງທີ່ມີຍານພາຫະນະປອດມົນລະພິດຫລາຍທີ່ສຸດໃນໂລກ. ສຳນັກຂ່າວຣອຍເຕີອ້າງການເປີດເຜີຍຂອງເຈົ້າໜ້າທີ່ສູນຄົນໜຶ່ງວ່າ: ຈາກການກວດສອບນະໂຍບາຍປັດຈຸບັນ ແລະ ແຜນການສົ່ງເສີມການຄົມມະນາຄົມທີ່ເປັນມິດຕໍ່ສິ່ງແວດລ້ອມພົບວ່າ: 10 ອັນດັບທຳອິດເປັນເມືອງຢູ່ເອີຣົບເຖິງ 8 ອັນດັບ ທີ່ເຫລືອເປັນນະຄອນຫລວງໂຕກຽວຂອງຍີ່ປຸ່ນ ແລະ ນະຄອງຫລວງເຊອຸນຂອງ ສ.ເກົາຫລີ.
ລາຍງານລະບຸວ່າ: ນະຄອນຫລວງອໍສະໂລຂອງນອກແວຈະເປັນເມືອງທຳອິດຂອງໂລກທີ່ມີຍານພາຫະນະປອດມົນລະພິດ ເພາະນອກຈາກລົດໂດຍສານສາທາລະນະສ່ວນຫລາຍໃຊ້ພະລັງງານນ້ຳ ຫລື ໄຟຟ້າ ແລະ ມີອັດຕາສ່ວນລົດໄຟຟ້າຫລາຍທີ່ສຸດໃນໂລກແລ້ວ, ສະພາເທສະບານຍັງກຽມຈຳກັດຈຳນວນຍານພາຫະນະທີ່ຈະແລ່ນເຂົ້າໃຈກາງເມືອງນຳອີກ, ອັນດັບສອງຄືນະຄອນຫລວງລອນດອນຂອງອັງກິດ ເພາະຊາວເມືອງສ່ວນຫລາຍໃຊ້ລົດໂດຍສານສາທາລະນະຫລາຍກວ່າລົດສ່ວນຕົວ, ທາງການມີແຜນຈະຫລຸດການປ່ອຍແກັສເຮືອນແກ້ວໃນປີ 2025 ລົງໃຫ້ໄດ້ 60% ຈາກລະດັບການປ່ອຍໃນປີ 1990 ສົ່ງເສີມການໃຊ້ລົດໄຟຟ້າ ແລະ ແບ່ງປັນລົດຖີບ, ອັນດັບສາມຄືນະຄອນຫລວງອຳສະເຕີດຳຂອງເນເທີແລນ, ສ່ວນອັນດັບສຸດທ້າຍຄືນະຄອນຫລວງໄຄໂຣຂອງເອຢິບ.
