ສຕລ ຍົກລະດັບຄູຝຶກລາຍເຊັນເອ

ໃນວັນທີ 30 ເມສາຜ່ານ​ມາ, ທີ່ສະຫະພັນບານເຕະແຫ່ງຊາດລາວ (ສຕລ) ໄດ້ມີການເປີດຝຶກອົບຮົມ ຄູຝຶກບານເຕະລະດັບ A ຂອງສະຫະພັນບານເຕະອາຊີ ເຊິ່ງເປັນການຈັດຄັ້ງທຳອິດ ໂດຍໃຫ້ກຽດເຂົ້າຮ່ວມພິທີເປີດໂດຍທ່ານ ຄຳແພງ ວົງຂັນຕີ ຮອງປະທານ ສຕລ, ທ່ານ ໄມວອງ (MIKE WONG MUN HENG) ວິທະຍາກອນ ຈາກ ເອເອັຟຊີ ສິງກະໂປ, ທ່ານ ສົມສະນຸກ ລຽນສະຫວັນ ຮອງເລຂາທິການ ສຕລ ພ້ອມດ້ວຍນັກສຳມະກອນເຂົ້າຮ່ວມ.

ການຝຶກອົບຮົມຄູຝຶກບານເຕະລະດັບ A ຂອງສະຫະພັນບານເຕະອາຊີ AFC ‘A’ Coaching Certificate Course ຈະດຳເນີນແຕ່ວັນທີ 30 ເມສາ ຫາ 26 ພຶດສະພາ 2018. ການຝຶກອົບຮົມຄັ້ງນີ້ ມີສໍາມະນາກອນເຂົ້າຮ່ວມທັງໝົດ 22 ຄົນ ຍິງ 2 ຄົນ ມາຈາກສະໂມສອນຕ່າງໆໃນນະຄອນຫລວງວຽງຈັນ ແລະ ຕ່າງແຂວງ, ສ່ວນປະເທດໄທ 3 ຄົນ ແລະ ປະເທດມາເລເຊຍ 1 ຄົນ ເຊິ່ງການຝຶກອົບຮົມດັ່ງກ່າວຈະມີການສອບເສັງ 5 ຄັ້ງ (ຕົວຈິງ 3 ຄັ້ງ ແລະ ທິດສະດີ 2 ຄັ້ງ).

ສຳລັບບຸກຄົນ, ສະໂມສອນໃດ ຫລື ພາກສ່ວນໃດຕ້ອງການຮຽນຄູຝຶກ ສາມາດຕິດຕໍ່ພົວພັນໄດ້ທີ່ ພະແນກເຕັກນິກ ສະຫະພັນບານເຕະແຫ່ງຊາດລາວ ໃນວັນເວລາລັດຖະການ ຫລື ສາມາດຕິດຕໍ່ສອບຖາມຂໍ້ມູນໄດ້ທີ່ ເບີໂທ: 02099707053, 020 54443133.