ລາວຫາລືມາດຕະການຕ້ານການຟອກເງິນ
ໃນວັນທີ 30 ເມສານີ້, ສຳນັກງານຂໍ້ມູນຕ້ານການຟອກເງິນ ໄດ້ຈັດກອງປະຊຸມຄະນະຊີ້ນຳລວມຂອງການປະເມີນຄວາມສ່ຽງລະດັບຊາດກ່ຽວກັບການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ເພື່ອປຶກສາຫາລື ການສ້າງຄວາມເຂັ້ມແຂງໃຫ້ແກ່ວຽກງານຕ້ານການຟອກເງິນໃນລະດັບຊາດ ແລະ ເປັນບ່ອນອີງໃນການປັບປຸງກົດໝາຍ, ລະບຽບການ, ການບັງຄັບໃຊ້ກົດໝາຍ ແລະ ມາດຕະການອື່ນໆໃນການຫລຸດຜ່ອນຄວາມສ່ຽງຕ່າງໆທີ່ອາດເກີດຂຶ້ນ. ກອງປະຊຸມໄດ້ລາຍງານກ່ຽວກັບຜົນການເກັບກຳຂໍ້ມູນການປະເມີນຄວາມສ່ຽງແຫ່ງຊາດກ່ຽວກັບການຕ້ານການຟອກເງິນ, ການສະໜອງທຶນແກ່ການກໍ່ການຮ້າຍທີ່ອາດຈະເກີດຂຶ້ນ ແລະ ແຜນການຈັດຕັ້ງປະຕິບັດໃນຕໍ່ໜ້າໃຫ້ມີຄວາມລະອຽດ, ຖືກຕ້ອງ ແລະ ມີຜົນສຳເລັດສູງ.
ກອງປະຊຸມດັ່ງກ່າວ, ໂດຍການເປັນປະທານຂອງທ່ານພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີຮອງລັດຖະມົນຕີກະຊວງການເງິນ, ກະຊວງອຸດສາຫະກຳ ແລະ ການຄ້າ, ຮອງຜູ້ວ່າການທະນາຄານແຫ່ງ ສປປ ລາວ, ຜູ້ຕາງໜ້າຈາກສະຖາບັນ, ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມນໍາດ້ວຍ.
