ອີໂວ້ຄັດເລືອກໄດ້ແລ້ວ 4 ນັກເຕະຫລວງນໍ້າທາ

ທີມອີໂວ້ ຢູໄນເຕັດ ຄັດເລືອກນັກກິລາແຂວງຫລວງນໍ້າທາ ໄດ້ແລ້ວຈໍານວນ 4 ຄົນ ທ້າຍເດືອນເມສາຜ່ານມາ ເພື່ອກຽມຄວາມພ້ອມເຂົ້າຮ່ວມການແຂ່ງຂັນບານ​ເຕະດີວີຊັນ 1 ຫລື ບານ​ເຕະສາຍ ກ ທີ່ສະຫະພັນບານເຕະຈະຈັດຂຶ້ນເດືອນພຶດສະພານີ້, ຂະນະທີ່ຄັດເລືອກຢູ່ນະຄອນຫລວງວຽງຈັນກາງເດືອນ ເມສາຜ່ານມາໄດ້ພຽງແຕ່ 30 ກວ່າຄົນ.

ທ່ານ ບູສະໄໝ ບຸດທະວົງ ຜູ້ຈັດການທີມ ອີໂວ້ ຢູໄນເຕັດ ໃຫ້ສໍາພາດວ່າ: ພາຍຫລັງສໍາເລັດການຄັດເລືອກຢູ່ນະຄອນຫລວງວຽງຈັນກາງເດືອນເມສາຜ່ານມາ ໂດຍພວກເຮົາຄັດເລືອກໄດ້ທັງໝົດ 30 ກວ່າຄົນ. ນອກຈາກນັ້ນ ຍັງຈະສືບຕໍ່ຄັດເລືອກໃຫ້ໄດ້ 25 ຄົນ ເພື່ອກຽມເຂົ້າຮ່ວມການແຂ່ງຂັນບານ​ເຕະສາຍ ກ ທີ່ຈະຈັດຂຶ້ນທ້າຍເດືອນນີ້. ສໍາລັບການຄັດເລືອກພວກເຮົາໄດ້ສືບຕໍ່ຄັດເລືອກນັກກິລາທີ່ແຂວງຫລວງນໍ້າທາທ້າຍເດືອນເມສາຜ່ານມານີ້ ໂດຍມີນັກກິລາເຂົ້າຮ່ວມຫລາຍພໍສົມຄວນ ເຊິ່ງໄດ້ສ້າງຄວາມເພິ່ງພໍໃຈຫລາຍພໍສົມຄວນ. ຜ່ານການຄັດເລືອກໄດ້ພຽງ 4 ຄົນຄື: ທ້າວ ສີວິໄຊ ສິດທີໄຊ, ທ້າວ ເກມກິລາ, ທ້າວ ໂລ ວິພັດ, ທ້າວ ໄຊປະເສີດ ລໍແປ໋ງຍ້ອນ.

ການແຂ່ງຂັນບານ​ເຕະສາຍ ກ ປະກອບມີ 16 ທີມຄື: ກອງທັບ ເອັຟຊີ (ແຊ້ມເກົ່າ), ນະຄອນຫລວງ ຢູໄນເຕັດ, ວິທະຍາໄລ ລາວ-ທ໋ອບ, ໂຮງຮຽນ ບຸນເກີດສຶກສາ ເອັຟຊີ, ຄີພີເອັສ ເອັຟຊີ,  ເອສະຣາ ເອັຟຊີ, ແບລາວ ອະຄາເດມີ Bears Laos Academy, ເມືອງຫາດ ຢູໄນເຕັດ,  LOB STADIUM, TRINITY FC, ສະຫວັນ ຢູໄນເຕັດ, ແຂວງວຽງຈັນ, ອີໂວ້ ຢູໄນເຕັດ, ດີເຄ ເອັຟຊີ,  ຊ້າງນ້ອຍ ເອັຟຊີ ແລະ ປກສ ເອັຟຊີ.