ຜູ້ນຳສອງເກົາຫລີມຸ່ງໝັ້ນສູ່ ສັນຕິພາບ-ຟື້ນຟູການຮ່ວມມື
ສຳນັກຂ່າວຕ່າງປະເທດລາຍງານວ່າ: ທ່ານ ຢຸນ ຢອງຊານ ໂຄສົກທຳນຽບປະທານາທິບໍດີ ສ.ເກົາຫລີ ຫລື ຊອງວາແດ ຖະແຫລງກ່ຽວກັບຜົນການຫາລືໃນໄລຍະທຳອິດລະຫວ່າງປະນາທິບໍດີ ມຸນ ແຈອິນ ກັບທ່ານ ກິມ ຈ໋ອງອຸນ ພາຍໃນຫ້ອງປະຊຸມຂອງອາຄານສັນຕິພາບ ໃນພື້ນທີ່ຄວາມໝັ້ນຄົງຮ່ວມໃນເຂດປານມູນຈອມເບື້ອງ ສ.ເກົາຫລີ ໃນຕອນເຊົ້າຂອງວັນທີ 27 ເມສານີ້ ຕາມເວລາທ້ອງຖິ່ນ ວ່າຜູ້ນຳທັງສອງປະເທດສະແດງຄວາມມຸ່ງໝັ້ນຢ່າງຈິງໃຈ ໃນການເພີ່ມຄວາມພະຍາຍາມຂອງແຕ່ລະຝ່າຍ ເພື່ອຊຸກຍູ້ຂະບວນການສັນຕິພາບ ແລະ ການຂະຫຍາຍການຮ່ວມມືໃນຫລາກຫລາຍມິຕິໃຫ້ມີຄວາມຄືບໜ້າ.
ທັງນີ້, ທ່ານ ກິມ ຈ໋ອງອຸນ ເປັນຝ່າຍຍົກບັນຫາການພັດພາກຂອງຄອບຄົວຊາວເກົາຫລີໃນໄລຍະສົງຄາມ ແລະ ເຫດການທີ່ກອງທັບ ສປປ ເກົາຫລີ ຍິງປືນໃຫຍ່ໂຈມຕີເກາະຢອນພະຢອງ ຂອງ ສ.ເກົາຫລີ ຈົນມີຜູ້ເສຍຊີວິດ 4 ຄົນ ໃນປີ 2010 ຕະຫລອດຮອດກຸ່ມພົນລະເມືອງ ສປປ ເກົາຫລີ ແປພັກ ວ່າບຸກຄົນເຊິ່ງມີຊ່ວງຊີວິດຢູ່ໃນເຫດການດັ່ງກ່າວຕັ້ງຄວາມຫວັງໄວ້ສູງຫລາຍກັບການພົບປະຫາລືຄັ້ງນີ້ ເຊິ່ງເປັນຄັ້ງທຳອິດໃນຮອບ 11 ປີ, ທ່ານຈຶ່ງຢາກໃຫ້ກອງປະຊຸມຄັ້ງນີ້ເປັນຈຸດເລີ່ມຕົ້ນຂອງການຮັກສາຜູ້ຄົນ ເຊິ່ງຍັງເຈັບປວດຈາກບາດແຜລຶກເຫລົ່ານັ້ນ. ຜູ້ນຳສູງສຸດຂອງ ສປປ ເກົາຫລີ ກ່າວອີກວ່າ: ທ່ານເຊື່ອໝັ້ນວ່າ ຖ້າທຸກຝ່າຍຮ່ວມກັນກ້າວຂ້າມຜ່ານເລື່ອງໃນອະດີດໄປໄດ້ ການເພີ່ມການຮ່ວມມືລະຫວ່າງສອງເກົາຫລີຈະບໍ່ມີສິ່ງໃດຂີດຂວາງໄດ້ອີກ.
