ງົວຕາຍເປັນຈຳນວນຫລາຍຢູ່ເຂດບ້ານໂຊກນ້ອຍແຕ່ຍັງບໍ່ຮູ້ສາເຫດ
ນີ້ເປັນຄັ້ງທີສອງແລ້ວ ທີ່ງົວປະຊາຊົນຈຳນວນ 12 ໂຕຕາຍຢູ່ບໍລິເວນເຂດບ້ານໂຊກນ້ອຍ, ນາບຽນ ແລະ ບ້ານໂພນທອງ, ເມືອງໄຊເສດຖານະຄອນຫລວງວຽງຈັນ, ເຊິ່ງຄັ້ງທຳອິດໄດ້ຕາຍ 21 ໂຕ ໃນລະຫວ່າງວັນທີ 17-26ມີນາຜ່ານມານີ້, ແຕ່ກໍບໍ່ທັນສາມາດສະຫລຸບໄດ້ຊັດເຈນວ່າສາເຫດການຕາຍມາຈາກຫຍັງ, ດ້ານຂະແໜງລ້ຽງສັດ ແລະ ການປະມົງ ໄດ້ພຽງສັນນິຖານວ່າອາດມາຈາກສອງສາເຫດຄື: ສັດບໍລິໂພກສານເຄມີໃນແຫລ່ງນ້ຳທີ່ຮົ່ວໄຫລມາຈາກໂຮງງງານອຸດສາຫະກຳ ແລະ ບໍລິໂພກສານເປັນພິດມາຈາກຂີ້ເບຍທີ່ໄດ້ກອງໄວ້ຈົນແຫ້ງຈາກແສງແດດ ແຕ່ເມື່ອມີຝົນຕົກອາດເກີດພິດກໍເປັນໄດ້, ເພາະໃນເຂດນັ້ນໄດ້ພາກສ່ວນໜຶ່ງເອົາຂີ້ເບຍມາຖີ້ມກອງໄວ້ເປັນເວລາຍາວ.
ຈຸດທີ່ສັດຕາຍນີ້, ນອນຢູ່ໃນເຂດເສດຖະກິດສະເພາະໄຊສະຖານກວມລວມເມືອງໄຊເສດຖາ, ເຊິ່ງເປັນບໍລິເວນທົ່ງກວ້າງ ມີໜອງ, ສາຍຫ້ວຍໄຫລຜ່ານທີ່ມາຈາກໂຮງງານອຸດສາຫະກຳ ແລະ ສ່ວນໜຶ່ງກໍເປັນບ່ອນຖອກຂີ້ເບຍເປັນບໍລິເວນກວ້າງ, ເຊິ່ງສັດລ້ຽງຂອງປະຊາຊົນເຂົ້າໄປຫາກິນຢູ່ບໍລິເວນດັ່ງກ່າວ, ຈຶ່ງເກີດມີສະພາບສັດຕາຍດັ່ງກ່າວ.
ຕໍ່ເຫດການນີ້, ພະແນກກະສິກຳ ແລະ ປ່າໄມ້ນະຄອນຫລວງວຽງຈັນຢັ້ງຢືນວ່າ: ຍ້ອນອຳນາດການປົກຄອງທ້ອງຖິ່ນແຈ້ງມາຊ້າ, ຈິ່ງບໍ່ສາມາດນຳຕົວຢ່າງຈາກສິ້ນສ່ວນສັດຕາຍນັ້ນໄປວິໄຈ ແລະ ພິສູດຫາສາເຫດຂອງການຕາຍດັ່ງ ກ່າວໄດ້. ອີກໜຶ່ງກໍບໍ່ມີເຄື່ອງມືທີ່ທັນສະໄໝມານຳໃຊ້ໃນການພິສູດ, ປັດຈຸບັນ ພຽງໄດ້ແຕ່ສັນນິຖານວ່າອາດເກີດຈາກສອງສາຍເຫດທີ່ລາຍງານຂ້າງເທິ່ງນັ້ນ.
ທ່ານນາງ ພັດສະລີ ນິດສະໄໝ ຫົວໜ້າຂະແໜງລ້ຽງສັດ ແລະ ການປະມົງນະຄອນຫລວງວຽງຈັນ ກ່າວວ່າ: ກ່ອນໜ້ານີ້, ໃນລະຫວ່າງວັນທີ 17-26 ມີນາຜ່ານມາ, ມີງົວຕາຍຈຳນວນ 21 ໂຕ, ເຊິ່ງກໍໄດ້ມີການຜ່າຕັດເບິ່ງເຫັນດິນປົນຫຍ້າໃນທ້ອງງົວ ແລະ ດິນດັ່ງກ່າວແມ່ນກົງກັບດິນບໍລິເວນບ່ອນຖອກຂີ້ເບຍ ເຊິ່ງມີມາແຕ່ດົນແລ້ວ, ເພາະຜູ້ເປັນເຈົ້າຂອງເວົ້າວ່າຈະເອົາມາເຮັດຝຸ່ນໃສ່ເຄື່ອງປູກ, ແຕ່ກໍບໍ່ເຫັນເອົາໄປນຳໃຊ້ຫຍັງແຖມຍັງສົ່ງກິ່ນເໝັນກະຈາຍໄປທົ່ວບໍລິເວນໃກ້ຄຽງ.
ແນວໃດກໍຕາມ, ສ່ວນຈຳນວນສັດທີ່ຕາຍນັ້ນ, ກໍບໍ່ມີປະຊາຊົນຄົນໃດອອກມາຢືນຢັນວ່າເປັນເຈົ້າຂອງງົວ, ພາລະຈຶ່ງຕົກເປັນຂອງພະນັກງານ, ອົງການປົກຄອງບ້ານເປັນເຈົ້າການໃນການມ້ຽນມັດ. ຢ່າງໃດກໍດີ, ທາງພະແນກກະສະກຳຍັງເປັນຫ່ວງ, ຈຶ່ງຮຽກຮ້ອງມາຍັງປະຊາຊົນບໍ່ໃຫ້ປ່ອຍສັດເຂົ້າໄປລ້ຽງໃນເຂດທີ່ມີຄວາມສ່ຽງນີ້ ແລະ ຫ້າມບໍລິໂພກຊີ້ນສັດຕາຍນີ້ຢ່າງເດັດຂາດ.
