ວິທີກຳຈັດບາດແຜຟົກຊ້ຳດຳຂຽວ

ຈະເວົ້າໄປມັນກໍບໍ່ແມ່ນເລື່ອງໃຫຍ່ຫຍັງຖ້າຈະມີຮ່ອງຮອຍຟົກຊຳ້ເຫລືອໄວ້ໃຫ້ເບິ່ງ ເພາະເຮົາສາມາດປິ່ນປົວມັນໄດ້, ແຕ່ຖ້າທ່ານບໍ່ສົນໃຈຮອຍຟົກຊຳ້ນີ້ອາດເຮັດໃຫ້ທ່ານບໍ່ງາມໄດ້.

     – ວິທີປະຖົມພະຍາບານບາດແຜຟົກຊຳ້ທີ່ມີອາການຜິວໜັງໃຄ່ບວມຮ່ວມນຳ : ການປະຄົບເຢັນເປັນການປະຖົມພະຍາບານເບື້ອງຕົ້ນທີ່ເໝາະສົມທີ່ສຸດເພື່ອຊ່ວຍໃຫ້ເສັ້ນເລືືອດທີ່ຈີກຂາດຫົດໂຕ ຈຶ່ງຊ່ວຍຫລຸດການກະຈາຍໂຕຂອງ ເລືອດທີ່ໄປຫຸ້ມຢູ່ບໍລິເວນເນື້ອເຍື່ອໃກ້ຄຽງໄດ້ ເຮັດໃຫ້ຮອຍຟົກຊຳ້ບໍ່ຂະຫຍາຍວົງກ້ວາງ, ໃຊ້ນຳ້ກ້ອນຫໍ່ໂດຍຜ້າປະຄົບບໍລິເວນທີ່ເປັນໄວ້ 15 ນາທີ ເຮັດໄດ້ເລື້ອຍໆ ແລະ ຄວນເຮັດແບບນີ້ຕິດຕໍ່ກັນໃນ  2 ມື້ທຳອິດທີ່ເກີດຮອຍຊຳ້.

ນອກຈາກນີ້, ໃຫ້ງົດໃຊ້ກ້າມຊີ້ນ ຫລື ເຄື່ອນໄຫວອະໄວຍະວະພາກສ່ວນນັ້ນຊົ່ວຄາວ ເພື່ອໃຫ້ບາດແຜໄດ້ພັກຜ່ອນ ຈຶ່ງຈະເຊົາໄວ ເພາະການເຄື່ອນໄຫວອອກແຮງຢູ່ອະໄວຍະວະນັ້ນ ຈະເຮັດໃຫ້ເລືອດຟອກ ເລືອດຈຶ່ງໄຫລອອກໄປຫົ້ງຢູ່ຜິວໜັງຫລາຍຂຶ້ນ ອາການປວດຍິ່ງເພ່ີມຂຶ້ນ ຮອຍຊຳ້ກໍຍິ່ງເຂັ້ມ ແລະ ນານເຊົາ, ແຕ່ຫາກຫລີກເວັ້ນການເຄື່ອນໄຫວບໍ່ໄດ້ແທ້ໆຄວນຫາຜ້າທີ່ມີຄວາມຫົດຢືດພັນທັບໄວ້ ເພື່ອຈຳກັດການເຄື່ອນໄຫວ ລວມເຖິງຈຳກັດປະລິມານເລືອດທີ່ໄຫລວຽນໃນບໍລິເວນນັ້ນນຳ.

      – ການປິ່ນປົວອາການທີ່ຕາມມາ : ອາການປວດບວມມັກເກີດຕາມມາຮ່ວມກັບຮອຍຟົກຊຳ້ ເຊິ່ງຖືເປັນເລື່ອງປົກກະຕິ ທ່ານສາມາດລະງັບອາການປວດໄດ້ໂດຍການກິນຢາແກ້ປວດ ຫລື ຢາທາເພື່ອຜ່ອນຄາຍກ້າມຊີ້ນທີ່ສາມາດຫລຸດຜ່ອນອາການປວດໄດ້ ເຊິ່ງຢາອະເຊຕາໄມໂນເຟນ (aceta – minophen) ດີສຳລັບຮອຍຊຳ້ແບບນີ້ ເພາະຊ່ວຍັງຫລຸດຜ່ອນອາ ການປວດ ແລະ ບໍ່ໃຫ້ເລືອດກ້າມເປັນກ້ອນ, ແຕ່ຄວນຫລີກເວັ້ນຢາແອສໄປຣິນ (aspirin)  ແລະ ໄອບູໂພຣເຟນ (ibuprofen) ເພາະຈະຍິ່ງເຮັດໃຫ້ເລືອດຢຸດໄຫລຊ້າ.  ນອກຈາກນີ້, ການກິນວິຕາມິນກາ ຍັງຊ່ວຍໃຫ້ຮ່າງກາຍສາມາດດູດຊຶມເລືອດໄດ້ດີຍິ່ງຂຶ້ນ ຈຶ່ງຊ່ວຍຫລຸດວົງກ້ວາງຂອງຮອຍຟົກຊຳ້ໄດ້ ທັງນີ້ມີຢາຫລາຍຂະໜານທີ່ມີສ່ວນປະສົມຂອງວິຕາມິນກາ ແລະ ສາມາດຫາຊື້ໄດ້ໂດຍບໍ່ຕ້ອງອາໄສໃບສັ່ງຢາຈາກແພດ.

ໃນມື້ທີ 3 ຂອງການປິ່ນປົວໃຫ້ປະຄົບອຸ່ນມື້ລະຫລາຍໆເທື່ອ ຈະຊ່ວຍໃຫ້ຮອຍຟົກຊຳ້ເຊົາໄວຂຶ້ນ ບາດແຜຊຳ້ທີ່ໄດ້ຮັບການເບິ່ງແຍງແບບນີ້ຄວນຈະເຊົາດີໄດ້ພາຍໃນ 7 – 10 ມື້ ລະຫ່ວາງນັ້ນທ່ານອາດຕ້ອງອາໄສການນຸ່ງເຄື່ອງທີ່ປົກປິດຮອຍຊຳ້ ຫລື ການໃຊ້ເຄື່ອງສຳອາງເພື່ອປັບສີຜິວໃຫ້ກ້ຽງສະເໝີກັນ ຊ່ວຍບັງສາຍຕາໄປກ່ອນ, ແຕ່ຫາກການເບິ່ງແຍງປິ່ນປົວແລ້ວ ອາການຍັງບໍ່ດີຂຶ້ນພາຍໃນ 2 ອາທິດ ຫລື ຍິ່ງຮູ້ສຶກເຈັບປວດຫລາຍຂຶ້ນ ເຖິງເວລານີ້ທ່ານຄວນໄປພົບແພດໂດຍໄວ ເພາະອາການບາດເຈັບທີ່ມີອາດຮຸນແຮງກ່ວາທີ່ປະກົດທາງຜິວໜັງກໍເປັນໄດ້.