ອີໂວ້ສືບຕໍ່ຄັດເລືອກນັກກິລາແຂວງຫລວງນໍ້າ

ທີມອີໂວ້ ຢູໄນເຕັດ ສືບຕໍ່ຄັດເລືອກນັກກິລາແຂວງຫລວງນໍ້າທາ ໃນວັນທີ 27 ເມສານີ້ ເພື່ອກຽມຄວາມພ້ອມເຂົ້າຮ່ວມການແຂ່ງຂັນບານ​ເຕະດີວີຊັນ 1 ຫລື ບານ​ເຕະສາຍ ກ ທີ່ສະຫະພັນບານເຕະຈະຈັດຂຶ້ນທ້າຍເດືອນເມສານີ້, ຂະນະທີ່ຄັດເລືອກຢູ່ນະຄອນຫລວງວຽງຈັນທ້າຍອາທິດຜ່ານມາໄດ້ພຽງແຕ່ 30 ກວ່າຄົນ ແລະ ຈະສືບຕໍ່ຄັດເລືອກນັກໃຫ້ໄດ້ຕາມທີ່ກໍານົດໄວ້.

ທ່ານ ບູສະໄໝ ບຸດທະວົງ ຜູ້ຈັດການທີມ ອີໂວ້ ຢູໄນເຕັດ ໃຫ້ສໍາພາດວ່າ: ພາຍຫລັງສໍາເລັດການຄັດເລືອກຢູ່ນະຄອນຫລວງວຽງຈັນທ້າຍອາທິດຜ່ານມາ ມີຜູ້ເຂົ້າຮ່ວມທັງໝົດ 400 ກວ່າຄົນ ເຊິ່ງພວກເຮົາສາມາດຄັດເລືອກໄດ້ທັງໝົດ 30 ກວ່າຄົນ. ນອກຈາກນັ້ນ ຍັງຈະສືບຕໍ່ຄັດເລືອກໃຫ້ໄດ້ພຽງແຕ່ 25 ຄົນເພື່ອກຽມເຂົ້າຮ່ວມການແຂ່ງຂັນເຕະບານສາຍ ກ ທີ່ຈະຈັດຂຶ້ນທ້າຍເດືອນນີ້. ສໍາລັບການຄັດເລືອກພວກເຮົາຍັງສືບຕໍ່ຄັດເລືອກນັກກິລາທີ່ແຂວງຫລວງນໍ້າທາ ເພື່ອເອົາເຂົ້າມາເສີມທີມ ໂດຍຈະຄັດເລືອກເອົາພຽງ 5 ຄົນເທົ່ານັ້ນ, ຂະນະທີ່ການເຂົ້າຮ່ວມແຂ່ງຂັນເຕະບານສາຍ ກ ຄັ້ງນີ້ ພວກເຮົາຕັ້ງເປົ້າໃຫ້ຕິດ 1 ໃນ 4 ທີມສຸດທ້າຍ.

ການແຂ່ງຂັນເຕະບານສາຍ ກ ປະກອບມີ 16 ທີມຄື: ກອງທັບ ເອັຟຊີ (ແຊ້ມເກົ່າ),ນະຄອນຫລວງ ຢູໄນເຕັດ, ວິທະຍາໄລ ລາວ-ທ໋ອບ, ໂຮງຮຽນ ບຸນເກີດສຶກສາ ເອັຟຊີ, ຄີພີເອັສ ເອັຟຊີ,  ເອສະຣາ ເອັຟຊີ, ແບລາວ ອະຄາເດມີ Bears Laos Academy, ເມືອງຫາດ ຢູໄນເຕັດ,  LOB STADIUM, TRINITY FC, ສະຫວັນ ຢູໄນເຕັດ, ແຂວງວຽງຈັນ, ອີໂວ້ ຢູໄນເຕັດ, ດີເຄ ເອັຟຊີ,  ຊ້າງນ້ອຍ ເອັຟຊີ ແລະ ປກສ ເອັຟຊີ.