ຍົກລະດັບທັກສະການວາງຢາສະຫລົບ ແລະ ຟື້ນຟູຊີບໃຫ້ແພດໝໍລາວ

ເມື່ອບໍ່ດົນມານີ້, ແພດໝໍສະເພາະດ້ານຈາກໂຮງໝໍມະໂຫສົດ, ມິດຕະພາບ, ເສດຖາທິລາດ, ແມ່ ແລະ ເດັກເກີດໃໝ່, ໂຮງໝໍ 103 ແລະ ໂຮງໝໍ 5 ເມສາ, ໄດ້ຮັບການຍົກລະດັບຄວາມຮູ້ກ່ຽວກັບການຕິດຕາມຄື້ນກະແສໄຟຟ້າຫົວໃຈ ແລະ ຄວາມດັນ ເພື່ອການປະເມີນຜົນບໍລິມາດເລືອດອອກຈາກຫົວໃຈຢ່າງຕໍ່ເນື່ອງ (ESCCO) ສໍາລັບການວາງຢາສະຫລົບ ແລະ ຟື້ນຟູຊີບ, ໂດຍຊຸດອົບຮົມນີ້, ແມ່ນມີບໍລິສັດ ຊີບີເອັຟ ຟາຣມາ ຈໍາກັດ, ບໍລິສັດ ນີຮອນ ໂກເດັນປະເທດໄທ, ສະມາຄົມແພດວາງຢາສະຫລົບ ແລະ ຟື້ນຟູຊີບລາວຮ່ວມກັນຈັດຂຶ້ນ, ພາຍຫລັງເຫັນວ່າເປັນພື້ນຖານຄວາມຮູ້ທີ່ສໍາຄັນຕໍ່ການນໍາໃຊ້ອຸປະກອນ ແລະ ເຄື່ອງຈັກທີ່ທັນສະໄໝໃນການຕິດຕາມອາການຂອງຄົນເຈັບ, ໂດຍສະເພາະແມ່ນເຄື່ອງປໍ້າຫົວໃຈ ແລະ ເຄື່ອງເຊີດຊູຫົວໃຈເຂົ້າໃນການກອບກູ້ຊີວິດຂອງຄົນໄດ້ຢ່າງເໝາະສົມ, ທັນເວລາ ແລະ ມີປະສິດທິຜົນສູງ, ເຊິ່ງຜູ້ເຂົ້າຮ່ວມ, ນອກຈາກໄດ້ຮຽນຮູ້ທາງດ້ານທິດສະດີແລ້ວຍັງໄດ້ທົດລອງນໍາໃຊ້ເຄື່ອງຈັກທາງການແພດທີ່ມີເຕັກໂນໂລຊີທັນສະໄໝດັ່ງກ່າວອີກດ້ວຍ.