ສຕລ ຖືກຟີຟາປັບໄໝ .576.000 ຢູໂຣ

ໃນວັນທີ 19 ເມສານີ້ ຟີຟາ ໄດ້ປັບໄໝສະໂມສອນບານເຕະ 5 ແຫ່ງ, ໃນນັ້ນ ລວມເຖິງສະຫະພັນບານເຕະແຫ່ງຊາດລາວ (ສຕລ). ຂະນະທີ່ ສຕລ ຖືກປັບໄໝໜັກທີ່ສຸດເປັນເງິນປະມານ 576.000 ຢູໂຣ ໃນກໍລະນີລະເມີດກົດການແລກປ່ຽນໂຕຜູ້ຫລິ້ນສາກົນ ແລະ ກົດການລົງທະບຽນຜູ້ຫລິ້ນທີ່ມີອາຍຸນ້ອຍໃນຄັ້ງທຳອິດ.

ຫລ້າສຸດ ສະຫະພັນບານເຕະແຫ່ງຊາດລາວ (ສຕລ) ໄດ້ແຈ້ງການຄໍາຕັດສິນຂອງຄະນະກໍາມະການລະບຽບວິໄນຟີຟ່າ ໂດຍລະບຸວ່າ: ສະຫະພັນບານເຕະແຫ່ງຊາດລາວ (ສຕລ) ຂໍແຈ້ງມາຍັງປວງຊົນລາວ, ບັນດາສື່ມວນຊົນລາວ ແລະ ຜູ້ຕິດຕາມກິລາບານເຕະທັງພາຍໃນ ແລະ ຕ່າງປະເທດ ໃຫ້ຊາບວ່າ: ສຕລ ໄດ້ຮັບຄໍາຕັດສິນຈາກສະຫະພັນບານເຕະນານາຊາດ (ຟີຟ່າ) ໃນວັນທີ 19 ເມສາ 2018. ສຕລ ຮູ້ສຶກຜິດຫວັງ ແລະ ກໍບໍ່ຄາດຄິດມາກ່ອນຕໍ່ກັບຄໍາຕັດສິນດັ່ງກ່າວ ແຕ່ກໍຕ້ອງມີການແກ້ໄຂບັນຫາຢ່າງທັນທ່ວງທີ ແລະ ຕາມຫລັກການ. ໃນເວລານີ້, ສຕລ ໂດຍຜ່ານທະນາຍຄວາມ ຈະຍື່ນຄໍາຮ້ອງຂໍລາຍລະອຽດທີ່ໃຊ້ໃນການພິຈາລະນາຕັດສິນຈາກຟີຟ່າ ແລະ ຈະຮ່ວມມືຢ່າງໃກ້ຊິດກັບບັນດາໜ່ວຍງານທີ່ກ່ຽວຂ້ອງທັງພາຍໃນ ແລະ ພາຍນອກ ເພື່ອໃຫ້ໄດ້ຂໍ້ສະຫລຸບທີ່ເໝາະສົມ.

ນັບແຕ່ເລິ່ມການສືບສວນ-ສອບສວນຄະດີດັ່ງກ່າວ, ສຕລ ໄດ້ໃຫ້ການຮ່ວມມືຢ່າງເຕັມທີ່ຕໍ່ຄະນະກໍາມະການລະບຽບວິໄນຂອງຟີຟ່າໃນການດໍາເນີນການສືບສວນເຫລົ່ານີ່ຢ່າງເປີດເຜີຍ ແລະ ຈິງໃຈ.