ຜູ້ນຳ ສປປ ເກົາຫລີ ຢ້ຽມຢາມຜູ້ບາດເຈັບ ຈາກເຫດການລົດທົວຈີນຕົກຂົວ
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ຂອງ ສ.ເກົາຫລີ ໃນວັນທີ 24 ເມສາ ໂດຍອ້າງຈາກລາຍງານຂອງສຳນັກຂ່າວກາງເກົາຫລີ (KCNA) ວ່າ: ທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ເດີນທາງໄປໂຮງໝໍແຫ່ງໜຶ່ງໃນນະຄອນຫລວງພຽງຢາງ ເພື່ອຢ້ຽມຢາມພົນລະເມືອງຊາວຈີນ 2 ຄົນ ເຊິ່ງໄດ້ຮັບບາດເຈັບຈາກອຸປະຕິເຫດລົດໂດຍສານເສຍຫລັກຕົກຂົວ ຢູ່ແຂວງຮວາງແຮເໜືອ ນອກນະຄອນຫລວງພຽງຢາງ ເຊິ່ງເຫດການເກີດຂຶ້ນໃນຄືນວັນທີ 22 ເມສາຕາມເວລາທ້ອງຖິ່ນ ເປັນເຫດໃຫ້ມີຜູ້ເສຍຊີວິດ 36 ຄົນ ແບ່ງເປັນນັກທ່ອງທ່ຽວຊາວຈີນ 32 ຄົນ ແລະ ຊາວ ສປປ ເກົາຫລີ 2 ຄົນ.
ທັງນີ້, ກ່ອນເດີນທາງໄປໂຮງໝໍ ທ່ານ ກິມ ຈ໋ອງອຸນ ໄດ້ເດີນທາງໄປສະຖານເອກອັກຄະລັດຖະທູດຈີນປະຈຳນະຄອນຫລວງພຽງຢາງ ເພື່ອສະແດງຄວາມເສຍໃຈຕໍ່ທ່ານ ຫລີ ຈິນຈຸ້ນ ເອກອັກຄະລັດຖະທູດຈີນ ໂດຍຜູ້ນຳ ສປປ ເກົາຫລີ ກ່າວວ່າ: ອຸປະຕິເຫດທີ່ເກີດຂຶ້ນໄດ້ສ້າງຄວາມສະເທືອນໃຈຢ່າງຍິ່ງໃຫ້ແກ່ຊາວ ສປປ ເກົາຫລີ. ຂະນະທີ່ກະຊວງການຕ່າງປະເທດໃນນະຄອນຫລວງປັກກິ່ງອອກຖະແຫລງການວ່າ: ລັດຖະບານຈີນໄດ້ສົ່ງບຸກຄະລາກອນທາງການແພດ ແລະ ເຈົ້າໜ້າທີ່ການທູດຈຳນວນໜຶ່ງເດີນທາງໄປນະຄອນຫລວງພຽງຢາງນຳອີກ.
