ນັກຂ່າວຖືກຍິງຕາຍໃນຂະນະລາຍງານສົດ ເຫດການປະທ້ວງຢູ່ນີກາຣາກວາ
ແຫລ່ງຂ່າວຕ່າງປະເທດໃຫ້ຮູ້ວ່າ: ເຫດການປະທ້ວງຄັດຄ້ານນະໂຍບາຍໃໝ່ຂອງປະທານາທິບໍດີນີກາຣາກວາ ໃນວັນທີ 24 ເມສາ ໄດ້ເຮັດໃຫ້ມີຜູ້ເສຍຊີວິດຢ່າງໜ້ອຍ 25 ຄົນ ແລະ ໃນນັ້ນ ມີນັກຂ່າວຜູ້ໜຶ່ງທີ່ກຳລັງຖ່າຍວີດີໂອລາຍງານສົດຜ່ານສື່ອອນລາຍກ່ຽວກັບເຫດການດັ່ງກ່າວ.
ແຫລ່ງຂ່າວລາຍງານວ່າ: ນັກຂ່າວຊື່ Angel Gahona ຖືກຍິງເສຍຊີວິດ ໃນຂະນະທີ່ລາວພວມນຳໃຊ້ໂທລະສັບມືຖືຂອງຕົນຖ່າຍຖອດສົດເຫດການປະທ້ວງດັ່ງກ່າວ ຢູ່ໃຈກາງຕົວເມືອງ Bluefields ໃນແຄມທະເລແຫ່ງໜຶ່ງ ຢູ່ເບື້ອງຕາເວັນອອກສຽງໃຕ້ນີກາຣາກວາ.
ຜູ້ຢູ່ເຫດການລາຍງານວ່າ: ໃນຂະນະທີ່ຂະບວນປະທ້ວງເດີນໃກ້ເຂົ້າໄປຕຶກເຮັດວຽກຂອງລັດຖະບານ ໂດຍບັງເອີນໄດ້ມີສຽງປືນດັງຂຶ້ນເປັນຮູດຍາວ ແລ້ວເຫັນນັກຂ່າວຜູ້ນີ້ລົ້ມຟຸມລົງແຄມຖະໜົນ ແລະ ໃນຂະນະນັ້ນກໍມີຫລາຍຄົນແລ່ນມາຊ່ວຍເຫລືອເອົາແພປິດເລືອດທີ່ໄຫລອອກມາຈາກບາດແຜ ຍ້ອນກະສຸນປືນຢູ່ເທິງຫົວຂອງລາວ ແຕ່ກໍບໍ່ສາມາດຊ່ວຍຫຍັງໄດ້ ຈາກນັ້ນການກາດຍິງຂະບວນປະທ້ວງກໍມະຫັບມະຫາຍໄປຢ່າງໄວວາ, ແຕ່ເຫດການອັນໂຫດຮ້າຍປ່າເຖື່ອນດັ່ງກ່າວໄດ້ແຜ່ກະຈາຍຜ່ານສື່ສັງຄົມອອນລາຍ ແລະ ໂທລະພາບຂອງທ້ອງຖິ່ນກໍໄດ້ນຳສະເໜີຂ່າວເຫດການປະທ້ວງດັ່ງກ່າວ.
