ໂອນສູນພັດທະນາຄູໄປຂຶ້ນກັບສະຖາບັນພັດທະນາຜູ້ບໍລິຫານການສຶກສາ
ພິທີມອບ-ໂອນສູນພັດທະນາຄູໄປຂຶ້ນກັບສະຖາບັນພັດທະນາຜູ້ບໍລິຫານການສຶກສາກະຊວງສຶກສາທິການ ແລະ ກິລາ ລະຫວ່າງທ່ານ ເກດ ພັນລັກ ວ່າການຫົວໜ້າກົມສ້າງຄູ ແລະ ທ່ານ ຈັນສະໝຸດ ແກ້ວສຸດທາ ຫົວໜ້າສະຖາບັນດັ່ງກ່າວ, ໄດ້ຈັດຂຶ້ນຢູ່ກະຊວງສຶກສາທິການ ແລະ ກິລາ ເມື່ອທ້າຍອາທິດຜ່ານມານີ້, ໂດຍມີຄະນະພັກ-ຄະນະນໍາອ້ອມຂ້າງກະຊວງດັ່ງກ່າວເຂົ້າຮ່ວມເປັນສັກຂີພິຍານ ເພື່ອປະຕິບັດຕາມຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະ ກິລາ ແລະ ແນໃສ່ເຮັດໃຫ້ການປະຕິບັດວຽກງານດັ່ງກ່າວມີປະສິດທິພາບ ແລະ ປະສິດທິຜົນດີຂຶ້ນ.
ຮອງຫົວໜ້າກົມຈັດຕັ້ງ-ພະນັກງານ ກະຊວງສຶກສາທິການ ແລະ ກິລາ ໃຫ້ຮູ້ວ່າ: ສູນພັດທະນາຄູ, ໄດ້ຮັບການສ້າງຕັ້ງຂຶ້ນເມື່ອເດືອນຕຸລາ 1993 ຕາມດຳລັດຂອງລັດຖະມົນຕີກະຊວງສຶກສາທິການ, ຊຶ່ງມີພາລະບົດບາດ ແລະ ໜ້າທີ່ໃນການຄົ້ນຄວ້າວຽກງານກໍ່ສ້າງ ແລະ ບຳລຸງຄູໃນທຸກລະດັບ ນັບແຕ່ຄູອະນຸບານ, ປະຖົມ ແລະ ມັດທະຍົມ, ພ້ອມທັງຝຶກອົບຮົມຍົກລະດັບຄູ ແລະ ພະນັກງານບໍລິຫານການສຶກສາ, ການພັດທະນາຫລັກສູດ, ປຶ້ມຕຳລາ, ປຶ້ມແບບຮຽນ, ປຶ້ມຄູ່ມືຄູ, ສື່ການຮຽນ-ການສອນສໍາລັບວິທະຍາໄລຄູໃນທົ່ວປະເທດ.
ໃນປີ 2013 ລັດຖະມົນຕີກະຊວງສຶກສາທິການ ແລະ ກິລາ ໄດ້ມີຂໍ້ຕົກລົງໂອນສູນພັດທະນາຄູຈາກຄະນະສຶກສາສາດມະຫາວິທະຍາໄລແຫ່ງຊາດໃຫ້ຂຶ້ນກັບກົມສ້າງຄູກະຊວງສຶກສາທິການ ແລະ ກິລາ. ກ່ອນຈະໂອນສູນດັ່ງກ່າວມາຂຶ້ນກັບສະຖາບັນພັດທະນາຜູ້ບໍລິຫານການສຶກສາໃນປັດຈຸບັນ.
ກະຊວງສຶກສາທິການ ແລະ ກິລາ ໃຫ້ຮູ້ວ່າ: ໃນປີຜ່ານມາ, ໄດ້ເອົາໃຈໃສ່ຜັນຂະຫຍາຍນະໂຍບາຍ, ຍຸດທະສາດ ແລະ ຈຸດສຸມຕ່າງໆໃນວຽກງານສຶກສາ ໂດຍສະເພາະວຽກງານຂະຫຍາຍໂອກາດການເຂົ້າຮຽນໃຫ້ທົ່ວເຖິງໃນທົ່ວປະເທດ, ອັນໄດ້ເຮັດໃຫ້ອັດຕາການເຂົ້າຮຽນສຸດທິຊັ້ນປະຖົມປະຕິບັດໄດ້ 98,7%, ຊັ້ນມັດທະຍົມຕອນຕົ້ນ 82%, ຊັ້ນມັດທະຍົມປາຍ 51%, ອັດຕາເຂົ້າຮຽນຂອງເດັກອາຍຸ 5 ປີປະຕິບັດໄດ້ 74%, ສ່ວນອັດຕາການປະລະການຮຽນຂອງນັກຮຽນ ປ1 ຢູ່ລະດັບ 6,9%, ຊັ້ນປະຖົມຢູ່ໃນລະດັບ 4,4%, ອັດຕາຄ້າງຫ້ອງຢູ່ໃນລະດັບ 4,1% ຂອງຈໍານວນນັກຮຽນໃນທົ່ວປະເທດ. ສາເຫດຍ້ອນການຂະຫຍາຍໂຮງຮຽນລະດັບຕ່າງໆຍັງບໍ່ທັນທົ່ວເຖິງ, ໂຮງຮຽນໃນເຂດຊົນນະບົດຫ່າງໄກສອກຫລີກຍັງຂາດຄູສອນ, ບາງທ້ອງຖິ່ນ, ບາງບ້ານມີແຕ່ໂຮງຮຽນປະຖົມ ຍັງບໍ່ມີໂຮງຮຽນມັດທະຍົມ ຈຶ່ງເຮັດໃຫ້ນັກຮຽນຕ້ອງເດີນທາງໄປຮຽນຢູ່ບ້ານອື່ນ ບາງເຂດເສັ້ນທາງມີຄວາມຫຍຸ້ງຍາກ, ຫ່າງໄກ ແລະ ບໍ່ມີບ່ອນພັກເຊົາສໍາລັບນັກຮຽນ, ຈຶ່ງເຮັດໃຫ້ບໍ່ສາມາດສືບຕໍ່ຮຽນໃນລະດັບມັດທະຍົມໄດ້.
