ຊາລາ ຂອງ ລິເວີພູລ ຄວ້ານັກເຕະດີເດັ່ນ ພີເອຟເອ ປະຈຳລະດູການນີ້
ຜົນການປະກາດລາງວັນຂອງສະມາຄົມນັກເຕະອາຊີບອັງກິດ ຫລື ພີເອຟເອ ປະຈຳລະດູການ 2017-2018 ໃນວັນທີ 22 ເມສາ 2018 ປາກົດວ່າ: ລາງວັນນັກເຕະດີເດັ່ນ ໄດ້ແກ່ ໂມຮາເໝັດ ຊາລາ ຂອງ ລິເວີພູລ ທີ່ຄວ້າລາງວັນໄປຄອງ ຈາກຜົນງານໃນລະດູການນີ້ ແລະ ນຳຕົ້ນສັງກັດ ລິເວີພູລ ຜ່ານເຂົ້າເຖິງຮອບຕັດເຊືອກ ຢູຟ່າ ແຊມປ້ຽນ ລີກ ເຮັດໃຫ້ລາວສ້າງປະຫວັດສາດເປັນຊາວເອຢິບຄົນທຳອິດທີ່ໄດ້ຮັບລາງວັນນີ້.
ຊາລາ ຍ້າຍຈາກ ໂຣມາ ໃນອີຕາລີ ມາຄ້າແຂ່ງກັບ ລິເວີພູລ ໃນລະດູຮ້ອນປີຜ່ານມາ ໂດຍລາວລົງຫລິ້ນໃຫ້ ລິເວີພູລ ໄປແລ້ວ 46 ນັດ ຍິງໄດ້ 41 ປະຕູ ໂດຍລາວໄດ້ຮັບຄະແນນໂຫວດສູງກວ່າ ເຄວິນ ບຣອຍ, ດາບິດ ຊິລບາ ແລະ ເລຣອຍ ຊາເນ 3 ຜູ້ຫລິ້ນຂອງ ແມນເຊັສເຕີ ຊິຕີ້, ດາບິດ ເດ ເຄອາ ຜູ້ຮັກສາປະຕູຂອງ ແມນເຊັສເຕີ ຢູໄນເຕັດ ແລະ ແຮຣີ ເຄນ ດາວຍິງຕົວເກັ່ງຂອງ ທອດແນມ ຮອດສະເປີ.
ຊາລາ ຖືເປັນນັກເຕະຄົນທີ 7 ຂອງ ລິເວີພູລ ທີ່ໄດ້ຮັບລາງວັນນີ້ຕໍ່ຈາກ ຫລຸຍ ຊົວເຣຊ (2013-14), ສະເຕີເວນ ເຈີຣາດ (2005-06), ຈອນ ບານ (1987-88), ອຽນ ຣັຊ (1983-84), ເຄນນີ ດັລກລິຊ (1982-83) ແລະ ເທີຣີ ແມ໊ກເດິມອຕ (1979-80).
ສ່ວນລາງວັນນັກເຕະດາວຮຸ່ງດີເດັ່ນ ຕົກເປັນຂອງ ເລຣອຍ ຊາເນ ປີກຄວາມໄວທີມຊາດເຢຍລະມັນ ຈາກຜົນງານການນຳຕົ້ນສັງກັດ ແມນເຊັສເຕີ ຊິຕີ ຄວ້າສອງແຊ້ມ (ພຣີເມຍລີກ ອັງກິດ ແລະ ລີກຄັບ) ລະດູການນີ້ໄປຄອງ.
