ອີໂວ້ຄັດເລືອກນັກກິລາກຽມເຂົ້າແຂ່ງຂັນສາຍ ກ

ໃນວັນທີ 22 ເມສາ ທີ່ສະໜາມກິລາສັບພະວິຊາ ເມືອງສີສັດຕະນາກ ນະຄອນຫລວງວຽງຈັນ. ທີມອີໂວ້ ຢູໄນເຕັດ ໄດ້ມີການຄັດເລືອກນັກກິລາເພື່ອກຽມຄວາມພ້ອມເຂົ້າຮ່ວມບານ​ເຕະດີວີຊັນ 1 ຫລື ບານ​ເຕະສາຍ ກ ທີ່ຈະເລີ່ມການແຂ່ງຂັນໃນທ້າຍເດືອນເມສານີ້ ເຊິ່ງມີນັກກິລາເຂົ້າຮ່ວມຄັດເລືອກ 400 ກວ່າຄົນ, ຂະນະທີ່ການແຂ່ງຂັນປີນີ້ມີ 16 ທີມເຂົ້າຮ່ວມ.

ທ່ານ ບູສະໄໝ ບຸດທະວົງ ຜູ້ຈັດການທີມ ອີໂວ້ ຢູໄນເຕັດ ໃຫ້ສໍາພາດວ່າ: ການຄັດເລືອກຄັ້ງນີ້ມີນັກກິລາເຂົ້າຮ່ວມ 400 ກວ່າຄົນ ເຊິ່ງທັງໝົດແມ່ນມາຈາກຫລາຍພາກສ່ວນ ເຊິ່ງໃນນັ້ນແມ່ນນັກຮຽນນັກສຶກສາຢູ່ບັນດາວິທະຍາໄລຕ່າງໆທົ່ວນະຄອນຫລວງວຽງຈັນ ເຊິ່ງຈະຄັດເລືອກເອົາພຽງ 25 ຄົນເທົ່ານັ້ນ ເພື່ອເປັນນັກກິລາໃຫ້ແກ່ທີມ ອີໂວ້ ຢູໄນເຕັດ ເພື່ອກຽມຝຶກຊ້ອມເຂົ້າຮ່ວມການແຂ່ງຂັນບານ​ເຕະດີວີຊັນ 1 ຫລື ບານ​ເຕະສາຍ ກ ທີ່ຈະຈັດຂຶ້ນໃນທ້າຍເດືອນນີ້. ສໍາລັບການເຂົ້າຮ່ວມແຂ່ງຂັນຄັ້ງນີ້ ທີມຂອງພວກເຮົາໄດ້ສົ່ງເຂົ້າເປັນຄັ້ງທໍາອິດ ແລະ ຕັ້ງເປົ້າໝາຍໃຫ້ຕິດ 1 ໃນ 4 ທີມສຸດທ້າຍຂອງການແຂ່ງຂັນດັ່ງກ່າວ.

ການແຂ່ງຂັນເຕະບານສາຍ ກ ປະກອບມີ 16 ທີມຄື: ກອງທັບ ເອັຟຊີ ( ແຊັມເກົ່າ ),ນະຄອນຫລວງ ຢູໄນເຕັດ, ວິທະຍາໄລ ລາວ-ທ໋ອບ, ໂຮງຮຽນ ບຸນເກີດສຶກສາ ເອັຟຊີ, ຄີພີເອັສ ເອັຟຊີ,  ເອສະຣາ ເອັຟຊີ, ແບລາວ ອະຄາເດມີ Bears Laos Academy, ເມືອງຫາດ ຢູໄນເຕັດ,  LOB STADIUM, TRINITY FC , ສະຫວັນ ຢູໄນເຕັດ, ແຂວງວຽງຈັນ, ອີໂວ້ ຢູໄນເຕັດ, ດີເຄ ເອັຟຊີ,  ຊ້າງນ້ອຍ ເອັຟຊີ ແລະ ປກສ ເອັຟຊີ.