ປະຊາກອນໂລມາອິຣາວະດີເພີ່ມຂຶ້ນ ເທື່ອທຳອິດໃນຮອບ 20 ປີ
ຈຳນວນປະຊາກອນໂລມາອິຣາວະດີ ເຊິ່ງພົບຫລາຍໃນລຸ່ມແມ່ນ້ຳຂອງເຂດກຳປູເຈຍ ມີຈຳນວນເພີ່ມຂຶ້ນເປັນເທື່ອທຳອິດ ນັບແຕ່ມີການບັນທຶກສະຖິຕິຢ່າງເປັນທາງການໃນປີ 1997.
ສຳນັກຂ່າວຕ່າງປະເທດລາຍງານຈາກນະຄອນຫລວງພະນົມເປັນ ປະເທດກຳປູເຈຍ ໃນວັນທີ 23 ເມສາວ່າ: ອົງການກອງທຶນສັດປ່າໂລກສາກົນ (WWF) ອອກຖະແຫລງການໃນວັນທີ 23 ເມສາວ່າ: ປະຊາກອນໂລມາອິຣາວະດີໃນແມ່ນ້ຳຂອງເພີ່ມຈຳນວນຂຶ້ນເປັນເທື່ອທຳອິດ ໂດຍສະຖິຕິທີ່ມີການບັນທຶກເປັນເທື່ອທຳອິດໃນປີ 1997 ພົບຈຳນວນປະຊາກອນໂລມາອິຣາວະດີໃນພື້ນທີ່ປະມານ 200 ໂຕ, ແຕ່ຫລຸດລົງເຫລືອພຽງ 80 ໂຕ ໃນປີ 2015 ເນື່ອງມາຈາກວິກິດສິ່ງແວດລ້ອມທີ່ສົ່ງຜົນກະທົບຢ່າງໜັກຕໍ່ລະບົບນິເວດ ແລະ ພຶດຕິກຳການຫາປາຂອງປະຊາຊົນໃນບໍລິເວນນັ້ນ.
ເຖິງຢ່າງໃດກໍຕາມ, ການເຝົ້າລະວັງຢ່າງໃກ້ຊິດຂອງຜູ້ຊ່ຽວຊານ ແລະ ການພັດທະນາດ້ານເຕັກໂນໂລຊີທີ່ເອື້ອອຳນວຍແກ່ການເພາະພັນໂລມາອິຣາວະດີ ຊ່ວຍໃຫ້ປະຊາກອນສັດລ້ຽງລູກດ້ວຍນົມຊະນິດນີ້ເພີ່ມຂຶ້ນອີກ ເຊິ່ງລວມທັງການເກີດໃໝ່ 3 ໂຕໃນຕົ້ນປີນີ້ ແລະ ຊ່ວຍຫລຸດອັດຕາການຕາຍກ່ອນໄວອັນຄວນຂອງໂລມາສາຍພັນນີ້ນຳອີກ.
Numbers of critically endangered Irrawaddy river dolphins are growing for the first time in decades https://t.co/rheOSU4WdP
— AFP News Agency (@AFP) April 23, 2018
ລາຍງານຂອງ WWF ຍັງສະແດງຄວາມກັງວົນວ່າ: “ຄວາມສ່ຽງຫລັກ” ຍັງມີຢູ່ ບໍ່ວ່າຈະເປັນການລັກລອບຈັບສັດນ້ຳ ທີ່ມີການໃຊ້ທັງລະເບີດ ແລະ ກະແສໄຟຟ້າ ຕະຫລອດຮອດເຮືອນັກທ່ອງທ່ຽວ ເຊິ່ງມັກສວຍໂອກາດຈັບສັດນ້ຳເຊັ່ນກັນ.
ປັດຈຸບັນ ກຳປູເຈຍເປັນແຫລ່ງທີ່ຢູ່ອາໄສຂະໜາດໃຫຍ່ທີ່ສຸດຂອງໂລມາອິຣາວະດີ ເຊິ່ງມີຊື່ເອີ້ນອີກຫລາຍຊື່ເຊັ່ນ: ໂລມາຫົວບາດມີຄີບຫລັງ, ໂລມານ້ຳຈືດ ແລະ ປາຂ່າ ໃນພາສາລາວ, ແຕ່ຍັງສາມາດພົບໄດ້ອີກໃນມຽນມາ, ອິນເດຍ, ອິນໂດເນເຊຍ ແລະ ໄທ.
