IS ອ້າງລະເບີດໜ່ວຍລົງທະບຽນ ເລືອກຕັ້ງອັບການິດສະຖານ
ມືລະເບີດຂ້າຕົວຕາຍລົງມືກໍ່ເຫດຢູ່ໜ່ວຍລົງທະບຽນຜູ້ມີສິດເລືອກຕັ້ງໃນນະຄອນຫລວງກາບູນ ປະເທດອັບການິດສະຖານ ໃນວັນທີ 22 ເມສາ ຂ້າຊີວິດຜູ້ຄົນໄປ 57 ສົບ ແລະ ບາດເຈັບ 100 ກວ່າຄົນ.
ສຳນັກຂ່າວຕ່າງປະເທດລາຍງານຈາກນະຄອນຫລວງກາບູນ ປະເທດອັບການິດສະຖານ ໃນວັນທີ 22 ເມສາວ່າ: ທ່ານ ນາຈິບ ດາເນຊ ໂຄສົກກະຊວງພາຍໃນຂອງອັບການິດສະຖານຖະແຫລງວ່າ: ຄົນຮ້າຍມືລະເບີດຂ້າຕົວຕາຍ 1 ຄົນຍ່າງເຂົ້າໄປກໍ່ເຫດ ໂດຍການຈູດສະນວນລະເບີດຂ້າຕົວຕາຍຢູ່ໜ່ວຍລົງທະບຽນຜູ້ມີສິດເລືອກຕັ້ງໃນນະຄອນຫລວງກາບູນ ວັນທີ 22 ເມສາ ຂະນະທີ່ເຈົ້າໜ້າທີ່ກຽມແຈກບັດປະຈຳຕົວຜູ້ມີສິດອອກສຽງເລືອກຕັ້ງສຳລັບການເລືອກຕັ້ງສະມາຊິກລັດຖະສະພາທີ່ກຳນົດຈະມີຂຶ້ນໃນເດືອນຕຸລາປີນີ້, ເບື້ອງຕົ້ນພົບຜູ້ເສຍຊີວິດ 31 ຄົນ ແລະ ບາດເຈັບອີກ 54 ຄົນ ຖືເປັນການໂຈມຕີທີ່ຮຸນແຮງທີ່ສຸດໃນນະຄອນຫລວງກາບູນນັບແຕ່ເຫດໂຈມຕີດ້ວຍລະເບີດເຊື່ອງໃນລົດໂຮງໝໍ ໃນເດືອນມັງກອນຜ່ານມາ ຂ້າຊີວິດຜູ້ຄົນໄປປະມານ 100 ຄົນ.
ຕໍ່ມາກຸ່ມຫົວຮຸນແຮງ IS ໄດ້ອອກມາປະກາດອ້າງຄວາມຮັບຜິດຊອບເຫດໂຈມຕີດັ່ງກ່າວ ເພາະເປັນປະຕິບັດການຄັ້ງສຳຄັນເພື່ອທຳລາຍຄວາມໜ້າເຊື່ອຖືຂອງລັດຖະບານປະທານາທິບໍດີ ອັຊຣາຟ ການີ ແຫ່ງອັບການິດສະຖານ ເຊິ່ງມີປະເທດຕາເວັນຕົກໃຫ້ການສະໜັບສະໜູນ. ທ່ານ ວາຮິດ ມາໂຣ ໂຄສົກກະຊວງສາທາລະນະສຸກຂອງອັບການິດສະຖານ ຖະແຫລງວ່າ: ພົບຜູ້ເສຍຊີວິດເພີ່ມຂຶ້ນເປັນ 57 ຄົນແລ້ວ ໃນຈຳນວນນີ້ເປັນຜູ້ຍິງ 22 ຄົນ ແລະ ເດັກ 7 ຄົນ. ຂະນະດຽວກັນ ກໍມີຜູ້ບາດເຈັບສູງເຖິງ 119 ຄົນ ແຍກເປັນຜູ້ຍິງ 52 ຄົນ ແລະ ເດັກ 17 ຄົນ ເຊິ່ງຕົວເລກຜູ້ເສຍຊີວິດອາດສູງກວ່ານີ້.
