ມອບ-ຮັບ ແລະ ເປີດນໍາໃຊ້ອາຄານສູນວິໄຈອາຫານປອດໄພຫລັງໃໝ່

ພິທີມອບ-ຮັບ ແລະ ເປີດນຳໃຊ້ອາຄານສູນວິໄຈອາຫານ ແລະ ຢາ (ສູນວິໄຈອາຫານປອດໄພ) ຫລັງໃໝ່, ຊຶ່ງຕັ້ງຢູ່ບ້ານເພຍວັດ, ເມືອງສັດຕະນາກ, ນະຄອນຫລວງວຽງຈັນ, ໄດ້ຈັດຂຶ້ນໃນວັນທີ 24 ເມສານີ້, ໂດຍການເຂົ້າຮ່ວມຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ ນາງ ໂກລດິນ ເລີດູ ເອກອັກຄະລັດຖະທູດຝຣັ່ງປະຈຳລາວ, ທ່ານ ອາແລງ ເມຣິເອີ ປະທານສະຖາບັນເມຣິເອີ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.

ທ່ານລັດຖະມົນຕີກະຊວງສາທາລະນະສຸກ ກ່າວວ່າ: ອາຄານແຫ່ງນີ້ເລີ່ມລົງມືກໍ່ສ້າງມາແຕ່ປີ 2016 ໂດຍໄດ້ຮັບທືນຊ່ວຍເຫລືອຈາກມູນນິທິເມຣິເອີປະເທດຝລັ່ງໃນມູນຄ່າການກໍ່ສ້າງຫລາຍກວ່າ 1,5 ລ້ານໂດລາສະຫະລັດ, ອາຄານແຫ່ງນີ້ປະກອບມີເຄື່ອງມືອຸປະກອນທີ່ທັນສະໄໝຄົບຊຸດເພື່ອຮັບໃຊ້ໃຫ້ແກ່ວຽກງານວິໄຈສານຕົກຄ້າງ ແລະ ສານປົນເປື້ອນຕ່າງໆໃນອາຫານ ແລະ ຢາ, ຊຶ່ງຈະຊ່ວຍໃຫ້ປະຊາຊົນ ກໍຄືຜູ້ບໍລິໂພກໄດ້ບໍລິໂພກອາຫານ ແລະ ຊົມໃຊ້ຢາທີ່ມີຄຸນນະພາບເຮັດໃຫ້ຮ່າງກາຍແຂງແຮງ. ສູນວິໄຈທີ່ສໍາຄັນແຫ່ງນີ້ຖືເປັນຄວາມຫມຸ່ງຫວັງຂອງລັດຖະບານ, ເນື່ອງຈາກປັດຈຸບັນປະເທດເຮົາໄດ້ເຂົ້າເປັນສະມາຊິກອົງການການຄ້າໂລກ ແລະ ປະຊາຄົມເສດຖະກິດອາຊຽນແລ້ວ, ສະນັ້ນຫ້ອງວິເຄາະແຫ່ງນີ້ຈະປະກອບສ່ວນສຳຄັນໃນການວິເຄາະອາຫານທີ່ພວກເຮົານຳເຂົ້າ ແລະ ສົ່ງອອກໃຫ້ມີມາດະຖານ ແລະ ມີຄວາມປອດໄພ, ທັງເປັນບ່ອນສຶກສາຄົ້ນຄ້ວາກ່ຽວກັບຄຸນນະພາບອາຫານ, ຊຶ່ງເປັນກຸນແຈສຳຄັນເຮັດໃຫ້ພວກເຮົາເຫັນເຖິງຄຸນນະພາບອາຫານທີ່ພວກເຮົາບໍລິໂພກມີຄວາມປອດໄພຫລາຍຂື້ນ, ພ້ອມນັ້ນຍັງເປັນບ່ອນສ້າງບຸກຄະລາກອນກ່ຽວກັບການວິໄຈອາຫານ ແລະ ຢາໃຫ້ມີຄວາມອາດສາມາດສູງຂື້ນກວ່າເກົ່າ.

ທ່ານລັດຖະມົນຕີກ່າວວ່າ: ຜ່ານມາມູນນິທິເມຣິເອີເຄີຍໃຫ້ການຊ່ວຍເຫລືອລາວສ້າງສູນວິໄຈພະຍາດຊຶມເຊື້ອອີກດ້ວຍ ແລະ ຫວັງເປັນຢ່າງຍິ່ງວ່າມູນນິທິດັ່ງກ່າວຈະສືບຕໍ່ໃຫ້ການຊ່ວຍເຫລືອ ແລະ ສະໜັບສະໜູນວຽກງານສາທາລະນະສຸກຂອງລາວໃນຕໍ່ໆໄປ.