ທ່ານຫົວໜ້າກົມມັດທະຍົມສຶກສາກະຊວງສຶກສາທິການ ແລະກິລາ ໃຫ້ຮູ້ວ່າ: ການສອບເສັງນັກຮຽນເກັ່ງປະຈຳສົກປີ 2016-2017ໄດ້ຈັດຂຶ້ນແຕ່ວັນທີ 25-26 ເມສານີ້ທີ່ມະຫາວິທະຍາໄລແຫ່ງຊາດ,ໂດຍປະກອບມີຊັ້ນ ມ4 ຈຳນວນ72ຄົນ, ຍິງ29ຄົນ ແລະຊັ້ນມ7 ຈຳນວນ 70 ຄົນ, ຍິງ28ຄົນເພື່ອຄັດເລືອກນັກຮຽນທີ່ມີພອນສະຫວັນໃນແຕ່ລະວິຊາເປັນຕົວແທນພາຍໃນປະເທດເຂົ້າຮ່ວມແຂ່ງຂັນສອບເສັງໃນລະດັບພາກພື້ນ ແລະສາກົນ, ທັງເປັນການສ້າງໂອກາດໃຫ້ຄູນຳພາ ແລະນັກຮຽນຈາກແຕ່ລະແຂວງໄດ້ພົບປະ, ຖອດຖອນບົດຮຽນເຊິ່ງກັນ ແລະກັນໃນການຈັດການຮຽນ-ການສອນ. ສໍາລັບບົດສອບເສັງໃນປີນີ້ ໄດ້ປະຕິບັດຕາມຂະບວນການສອບເສັງໃນປີຜ່ານມາ, ໂດຍອີງໃສ່ຫລັກສູດການຮຽນ-ການສອນທີ່ເຄີຍຮຽນມາ, ຊຶ່ງຈະມີລະດັບປານກາງໄປຫາຍາກ ແລະຍາກຫລາຍ, ໂດຍຄະນະກຳມະການບໍ່ໃຫ້ອະນຸຍາດນຳເອົາເຄື່ອງມີສື່ສານທຸກຊະນິດ, ເອກກະສານທຸກປະເພດເຂົ້າໃນຫ້ອງສອບເສັງເດັດຂາດ, ພ້ອມທັງປະຕິບັດລະບຽບທີ່ຫ້ອງສອບເສັງວາງອອກຢ່າງເຂັ້ມງວດ ເປັນຕົ້ນ:ຫ້າມບໍ່ໃຫ້ລົມກັນ, ບໍ່ໃຫ້ປຶກສາຫາລືກັບໝູ່ພາຍໃນຫ້ອງ, ບໍ່ໃຫ້ຍ່າງອອກ-ເຂົ້າ ໂດຍບໍ່ໄດ້ຮັບອະນຸຍາດຈາກຄະນະກຳມະການທີ່ຍາມຫ້ອງສອບເສັງ.
ທ່ານຫົວໜ້າກົມມັດທະຍົມສຶກສາກ່າວວ່າ: ສຳລັບຄະນະກຳມະການຜູ້ທີ່ຈະກວດບົດສອບເສັງ ແລະ ໃຫ້ຄະແນນນັ້ນ, ທາງກະຊວງສຶກສາທິການ ແລະກິລາ ໄດ້ຄັດເລືອກເອົາຢ່າງລະອຽດ ເພື່ອໃຫ້ມີຄວາມໂປ່ງໃສ, ເປັນທຳ ແລະມີຄຸນນະພາບ, ໂດຍຈັດແບ່ງອອກເປັນແຕ່ລະວິຊາ, ຊຶ່ງຄະນະກຳມະການຈະບໍ່ສາມາດຮູ້ໄດ້ວ່າບົດສອບເສັງທີ່ຕົນກວດຢູ່ນັ້ນເປັນຂອງໃຜ, ຊື່ຫຍັງ ເພາະໄດ້ມີການຕັດຫົວຄວັ່ນລາຍຊື່ອອກທັງໝົດ. ຂະນະດຽວກັນສຳລັບຜູ້ທີ່ສອບເສັງໄດ້ຄະແນນສູງສຸດອັນດັບທີ 1, 2 ແລະ 3 ຈະໄດ້ຮັບສິດພິເສດໃນການເຂົ້າສຶກສາຢູ່ມະຫາວິທະຍາໄລແຫ່ງຊາດ ແລະສາມາດເລືອກສາຍຮຽນໄດ້ຕາມຄວາມຕ້ອງການ ແລະ ໄດ້ຮັບທຶນການສຶກສາ, ໃບຍ້ອງຍໍ ແລະຫລຽນນັກຮຽນເກັ່ງອີກດ້ວຍ.
