ທ່ານ ທຣຳ ຂູ່ຖອນຕົວຖ້າການເຈລະຈາ ກັບ ສປປ ເກົາຫລີ ບໍ່ເກີດປະໂຫຍດ
ປະທານາທິບໍດີອາເມລິກາ ສະແດງຄວາມເຊື່ອໝັ້ນໃນການພົບປະຫາລືກັບຜູ້ນຳສູງສຸດຂອງ ສປປ ເກົາຫລີ, ແຕ່ຍັງພ້ອມຖອນຕົວສະເໝີ ຖ້າພິຈາລະນາແລ້ວພົບວ່າການເຈລະຈາ “ບໍ່ເກີດປະໂຫຍດ”.
ສຳນັກຂ່າວຕ່າງປະເທດລາຍງານຈາກເມືອງເວສປາມບີຊ ປະເທດສະຫະລັດອາເມລິກາ ໃນວັນທີ 18 ເມສາວ່າ: ປະທານາທິບໍດີ ໂດນັນ ທຣຳ ກ່າວຫລັງພົບປະຫາລືກັບນາຍົກລັດຖະມົນຕີ ຊິນໂຊ ອາເບະ ວ່າ: ທ່ານມີຄວາມພ້ອມຢ່າງເຕັມສ່ວນ ແລະ ເຝົ້າລໍວັນທີ່ຈະໄດ້ພົບປະຫາລືກັບທ່ານ ກິມ ຈອງອິນ ເຊິ່ງຈະຖືເປັນການພົບປະຫາລືຄັ້ງທຳອິດ ແລະ ຄັ້ງປະຫວັດສາດລະຫວ່າງຜູ້ນຳອາເມລິກາກັບຜູ້ນຳສູງສຸດຂອງ ສປປ ເກົາຫລີ. ເຖິງຢ່າງໃດກໍຕາມ, ຖ້າມີການວິເຄາະ ແລະ ຕີລາຄາສະຖານະການແລ້ວວ່າ: ການປະຊຸມທີ່ຈະເກີດຂຶ້ນ “ບໍ່ນຳໄປສູ່ຄວາມຄືບໜ້າຢ່າງສ້າງສັນ” ຫລື ບົ່ງບອກສັນຍານຂອງການປະສົບຜົນສຳເລັດໃນບັນຫາໃດ, ທ່ານພ້ອມຈະຖອນຕົວອອກຈາກກອງປະຊຸມ.
ຂະນະດຽວກັນ, ທ່ານ ທຣຳ ກ່າວອີກວ່າ: ອາເມລິກາຈະຍັງເດີນໜ້າ “ມາດຕະການກົດດັນຂັ້ນສູງສຸດ” ທັງໃນທາງເສດຖະກິດ ແລະ ການທູດຕໍ່ ສປປ ເກົາຫລີ ຕໍ່ໄປ ຈົນກວ່າລັດຖະບານພຽງຢາງຈະຍອມປົດອາວຸດນິວເຄຼຍເປັນການຖາວອນ.
