ອິນໂດເນເຊຍເລັ່ງສົ່ງອອກໄບໂອດິເຊລເພີ່ມ ຫລັງ EU ຍົກເລີກເກັບພາສີທຸ່ມຕະຫລາດ
ຜູ້ຜະລິດໄບໂອດີເຊລກຳລັງເລັ່ງເພີ່ມການສົ່ງອອກ ພາຍຫລັງສະຫະພາບເອີຣົບ (EU) ຍົກເລີກການເກັບພາສີທຸ່ມຕະຫລາດກັບຜູ້ຜະລິດບາງລາຍ. ຂະນະທີ່ມາເລເຊຍ ເຊິ່ງສົ່ງອອກໄບໂອດີເຊລລາຄາແພງກວ່າສ່ຽງເສຍສ່ວນແບ່ງຕະຫລາດ.
ສານສະຖິຕິຍຸຕິທຳເອີຣົບ ເຊິ່ງເປັນສານສູງສຸດຂອງ EU ມີຄຳຕັດສິນໃນເດືອນກ່ອນໃຫ້ EU ຍົກເລີກການເກັບພາສີທຸ່ມຕະຫລາດ 8,8-23,3% ກັບໄບໂອດີເຊລນຳເຂົ້າຈາກອິນໂດເນເຊຍນັບແຕ່ວັນທີ 16 ມີນາ, ພາຍຫລັງບັງຄັບໃຊ້ກັບບໍລິສັດອິນໂດເນເຊຍ ແລະ ອາກຊັງຕິນມາແຕ່ປີ 2013. ຄຳຕັດສິນນີ້ເປັນປະໂຫຍດຫລາຍຕໍ່ອິນໂດເນເຊຍ ຜູ້ຜະລິດໄບໂອດີເຊລຈາກປາມນ້ຳມັນລາຍໃຫຍ່ທີ່ສຸດໃນໂລກ, ແຕ່ຈະເຮັດໃຫ້ມາເລເຊຍເສຍສ່ວນແບ່ງຕະຫລາດ ເພາະສົ່ງອອກແພງກວ່າອິນໂດເນເຊຍໂຕນລະ 30-40 ໂດລາສະຫະລັດ ເນື່ອງຈາກຂະໜາດອຸດສາຫະກຳນ້ອຍກວ່າ.
ປະທານສະມາຄົມຜູ້ຜະລິດໄບໂອດີເຊລອິນໂດເນເຊຍ ເປີດເຜີຍວ່າ: ຜູ້ຜະລິດບາງລາຍເລີ່ມສົ່ງອອກໄປເອີຣົບແລ້ວ ຄາດວ່າຍອດສົ່ງອອກໄປ EU ປີນີ້ຈະບັນລຸ 432.000 ໂຕນ ທຽບໃສ່ປີກ່ອນເກືອບບໍ່ໄດ້ສົ່ງອອກເລີຍ. ຂະນະທີ່ປະທານສະມາຄົມໄບໂອດີເຊລມາເລເຊຍ ກ່າວວ່າ: ປີຜ່ານມາ ຍອດສົ່ງອອກດີຫລາຍ ສາມາດສົ່ງອອກເຖິງ 235.000 ໂຕນ ເພີ່ມຂຶ້ນຢ່າງກ້າວກະໂດດຈາກ 83.000 ໂຕນໃນປີກ່ອນໜ້ານັ້ນ ເພາະມີຊ່ອງທາງສົ່ງອອກໄປ EU, ແຕ່ຕອນນີ້ມາເລເຊຍເສຍຄວາມສາມາດໃນການແຂ່ງຂັນແລ້ວ. ເຖິງຢ່າງໃດກໍດີ, ນັກຄ້າບາງຄົນເຕືອນວ່າ: ໄບໂອດີເຊລຈາກປາມນ້ຳມັນຂອງອິນໂດເນເຊຍອາດຕ້ອງແຂ່ງຂັນໜັກກັບໄບໂອດີເຊລຈາກຖົ່ວເຫລືອງທີ່ມີລາຄາຊໍ່າກັນ.
